اسلام آ با د (نیوز ڈیسک)پاکستان تحریک انصاف (پی ٹی آئی) کے بانی نے وزیراعلیٰ پنجاب مریم نواز کے خلاف مقدمہ درج کرانے کے لیے کیپیٹل پولیس آفیسر (سی پی او) کو باضابطہ درخواست جمع کروا دی۔تفصیلات کے مطابق بانی پی ٹی آئی کے وکیل تابش فاروق نے یہ درخواست کوریئر کے ذریعے سی پی او آفس بھجوائی، جس میں وزیراعلیٰ پنجاب سمیت 8 افراد کو نامزد کیا گیا ہے۔ درخواست میں اسسٹنٹ سپرنٹنڈنٹ آف پولیس (اے ایس پی) زینب، اسٹیشن ہاؤس آفیسر (ایس ایچ او) اعزاز اور سپرنٹنڈنٹ جیل بھی شامل ہیں۔درخواست کے متن میں کہا گیا ہے کہ بانی پی ٹی آئی کو قید کے دوران بنیادی سہولیات فراہم نہیں کی جا رہیں اور ان کے سیل میں روشنی تک میسر نہیں۔

الزام عائد کیا گیا ہے کہ یہ اقدامات وزیراعلیٰ پنجاب مریم نواز کی ہدایت پر کیے جا رہے ہیں۔ مزید کہا گیا کہ بانی پی ٹی آئی کے اہل خانہ کو ملاقات کی اجازت نہیں دی جا رہی اور ہائیکورٹ کے احکامات کی بھی خلاف ورزی کی جا رہی ہے۔درخواست میں مؤقف اختیار کیا گیا ہے کہ مریم نواز نے ماضی میں دھمکیاں دیتے ہوئے بانی پی ٹی آئی کو ’فتنہ‘ قرار دیا تھا، جبکہ اے ایس پی، ایس ایچ او اور چوکی انچارج اہل خانہ کو ہراساں کرنے میں ملوث ہیں۔ درخواست میں مطالبہ کیا گیا ہے کہ مریم نواز سمیت 8 افراد کے خلاف مقدمہ درج کر کے قانونی کارروائی عمل میں لائی جائے۔