اسلام آباد (خصوصی رپورٹ) حالیہ دنوں میں بھارت کی جانب سے پاکستان کے خلاف مسلسل بے بنیاد الزامات اور اشتعال انگیز بیانات سامنے آ رہے تھے، جن کا پاکستان نے بالآخر بھرپور اور مؤثر جواب دے کر خاموش کر دیا۔ دلچسپ بات یہ ہے کہ بھارتی میڈیا، جو ہمیشہ پاکستان مخالف پروپیگنڈے میں پیش پیش ہوتا ہے، اب خود بھی اس جوابی کارروائی کا اعتراف کرنے پر مجبور ہو گیا ہے۔
سوشل میڈیا پر وائرل ہونے والی بھارتی چینل “ٹی 9” کی ایک ویڈیو میں بھارتی اینکر کو یہ کہتے سنا جا سکتا ہے کہ “پاکستان نے آج صبح کئی اہداف کو نشانہ بنایا، فضائی حدود کی خلاف ورزی کی گئی، اور یہ کارروائیاں اس بات کا اظہار ہیں کہ پاکستان کسی دباؤ میں نہیں آ رہا۔”
ویڈیو میں یہ بھی سننے کو ملا کہ “ہماری طرف سے بارہا کہا گیا تھا کہ جو بھی پاکستان کرے گا، ہم اس کا جواب دیں گے، لیکن جو کچھ آج ہوا وہ حیران کن ہے۔ امریکہ کی جانب سے کالز آ رہی ہیں، لیکن پاکستانی آرمی چیف جنرل عاصم منیر اپنی حکمت عملی سے پیچھے ہٹنے کو تیار نہیں۔”
ایک اور کلپ میں مقرر نے دعویٰ کیا کہ “امریکہ کی جانب سے وزیراعظم پاکستان کو پیغام پہنچایا گیا، مگر پاکستان نہ صرف بات سننے سے گریزاں ہے بلکہ امریکہ کی اپیلوں کو بھی خاطر میں نہیں لا رہا۔”
اس تمام صورت حال نے بھارتی میڈیا میں تشویش کی لہر دوڑا دی ہے، اور بعض تجزیہ کار اس صورتحال کو جنرل عاصم منیر کی ذاتی قیادت اور مؤقف سے جوڑ رہے ہیں۔ ان کے مطابق، اب یہ معاملہ پاکستان کی عسکری قیادت کے عزم کی عکاسی کرتا ہے کہ وہ قومی سلامتی کے حوالے سے کوئی سمجھوتہ نہیں کریں گے۔
