اسلام آباد (نمائندہ خصوصی) وزیراعظم شہباز شریف نے بھارت کی جانب سے کیے گئے حملوں کے جواب میں پاکستان کے مؤثر اور کامیاب فوجی اقدام پر قوم کو مبارکباد پیش کی ہے اور ملکی سیاسی قیادت سے رابطے کرکے اُنہیں اعتماد میں لیا ہے۔
ذرائع کے مطابق، وزیراعظم نے چیئرمین پاکستان پیپلز پارٹی بلاول بھٹو زرداری، جمعیت علمائے اسلام (ف) کے سربراہ مولانا فضل الرحمان، تحریک انصاف کے رہنما بیرسٹر گوہر، ایم کیو ایم کے خالد مقبول صدیقی، جماعت اسلامی کے امیر حافظ نعیم الرحمٰن، بلوچستان عوامی پارٹی کے خالد مگسی اور مسلم لیگ (ق) کے چوہدری سالک حسین سمیت دیگر قائدین سے ٹیلیفونک گفتگو کی۔
گفتگو کے دوران وزیراعظم نے بتایا کہ بھارت نے پہلگام واقعے کا بہانہ بنا کر پاکستان پر میزائل اور ڈرونز سے حملے کیے۔ ان حملوں کے باوجود پاکستان نے ابتدا میں انتہائی بردباری اور صبر کا مظاہرہ کیا، لیکن بھارت کی مسلسل جارحیت کے بعد افواجِ پاکستان نے بھرپور اور ٹھوس ردِ عمل دیا، جس پر پوری قوم کو فخر ہے۔
شہباز شریف کا کہنا تھا کہ “افواجِ پاکستان نے پیشہ ورانہ مہارت اور حکمتِ عملی سے دشمن کو جواب دیا، ہم نے بے گناہ شہداء کا بدلہ لے لیا ہے، اور آج کا دن بھارت کو واضح پیغام دینے کا دن ہے کہ پاکستان اپنی خودمختاری پر کوئی سمجھوتہ نہیں کرے گا۔”
انہوں نے مزید کہا کہ بھارت نے غیرجانبدارانہ تحقیقات کی پیشکش کو مسترد کر کے اپنی بدنیتی کو واضح کیا، مگر ہم ہر سطح پر امن کے خواہاں ہیں، تاہم دفاعِ وطن پر کوئی سمجھوتہ نہیں کیا جائے گا۔
ملکی سیاسی قائدین نے بھی افواج پاکستان کے کردار کو سراہتے ہوئے ان کی پیشہ ورانہ صلاحیت، دلیری اور بصیرت کی تعریف کی اور حکومت کو اپنے مکمل تعاون اور یکجہتی کا یقین دلایا۔
بعد ازاں، وزیراعظم نے تمام سیاسی رہنماؤں کی جانب سے غیر مشروط حمایت پر ان کا شکریہ ادا کیا۔ ذرائع کے مطابق، وزیراعظم آج رات قوم سے اہم خطاب بھی کریں گے جس میں حالیہ صورت حال پر تفصیلی روشنی ڈالی جائے گی۔
