اسلام آباد (نیوز ڈیسک)لاہور ہائی کورٹ نے موٹروے گینگ ریپ کیس میں سزائے موت پانے والے عابد ملہی اور شفقت بگا کی اپیلوں پر سماعت کے لیے 8 مئی کی تاریخ مقرر کر دی ہے۔
یہ اپیلیں جسٹس سید شہباز علی رضوی اور جسٹس طارق محمود باجوہ پر مشتمل دو رکنی بینچ کے روبرو پیش کی جائیں گی، جو مجرمان کی جانب سے سزاؤں کے خلاف دائر کی گئی ہیں۔ یاد رہے کہ یہ افسوسناک واقعہ 9 ستمبر 2020 کو تھانہ گجرپورہ کی حدود میں پیش آیا تھا، جس پر مختلف سنگین نوعیت کی دفعات کے تحت مقدمہ درج کیا گیا تھا۔
مجرمان کے خلاف جن دفعات کے تحت مقدمہ چلایا گیا ان میں دہشت گردی کی دفعہ 7 اے ٹی اے، اغوا، ڈکیتی، اور نقصان رسانی جیسی سنگین دفعات شامل تھیں۔ انسداد دہشت گردی عدالت نے 20 مارچ 2021 کو مجرموں کو اجتماعی زیادتی کے جرم میں سزائے موت سنائی تھی۔
اس کے ساتھ ساتھ، عدالت نے دونوں مجرموں کو ڈکیتی کے جرم میں 14 سال قید اور ڈھائی لاکھ روپے جرمانے کی سزا بھی دی تھی۔ متاثرہ خاتون کے بچوں کو اغوا کرنے کے جرم میں عمر قید جبکہ گاڑی کو نقصان پہنچانے پر پانچ سال قید کی سزا دی گئی تھی۔
