اسلام آباد (نیوز ڈیسک) — زلزلوں کی پیشگی اطلاع دینے والے نجی ادارے EQQN کے بانی شہباز لغاری نے امکان ظاہر کیا ہے کہ آئندہ ہفتے پاکستان اور افغانستان کے مختلف علاقوں میں 5.4 شدت کا زلزلہ آ سکتا ہے، جس کے جھٹکے ملک کے شمالی و جنوبی حصوں میں محسوس کیے جا سکتے ہیں۔
شہباز لغاری کے مطابق، ان کے ادارے کا تیار کردہ خودکار سسٹم زلزلوں کی پیش گوئی 128 گھنٹے پہلے کرنے کی صلاحیت رکھتا ہے۔ ان کا دعویٰ ہے کہ اس نظام کی مدد سے کی گئی سابقہ تمام پیش گوئیاں درست ثابت ہوئی ہیں۔
انہوں نے حالیہ زلزلے کا حوالہ دیتے ہوئے کہا، “12 اپریل 2025 کو آنے والے زلزلے کی ہم نے 7 اپریل کو اسلام آباد میں ایک پریس کانفرنس کے دوران پیش گوئی کی تھی، جس کا مکمل ریکارڈ بھی موجود ہے۔”
شہباز لغاری نے عوام سے اپیل کی کہ وہ ای کیو کیو این کا یوٹیوب چینل سبسکرائب کریں تاکہ زلزلوں سے متعلق تازہ ترین معلومات اور بروقت انتباہات حاصل کیے جا سکیں۔
ان کا کہنا تھا کہ ان کی تنظیم کا مقصد صرف اور صرف انسانی جانوں کو بچانا ہے۔ “ہم پاکستان کے ارد گرد پانچ ہزار کلومیٹر کے دائرے میں زلزلوں کی نگرانی کرتے ہیں اور پیشگی الرٹ فراہم کرتے ہیں۔”
انہوں نے مزید بتایا کہ EQQN دنیا کی پہلی غیر سرکاری زلزلہ پیش گوئی تنظیم ہے جو سائنسی تحقیق اور ڈیٹا پر مبنی انداز میں کام کر رہی ہے۔
