راولپنڈی (این این آئی)پاکستان تحریک انصاف کے رہنما شیر افضل مروت نے کہا ہے کہ بیرون ممالک کچھ لوگ ڈالر کمانے کیلئے پی ٹی آئی کو استعمال کر رہے ہیں۔اڈیالہ جیل کے باہر میڈیا سے گفتگو کرتے ہوئے شیر افضل مروت نے کہا کہ مذاکرات کیلئے جیل میں بانی پی ٹی آئی سے ملنا ضروری ہے۔انہوں نے کہا کہ ہائی کورٹ نے بلا رکاوٹ ملاقات کروانے کے احکامات دے رکھے ہیں۔

شیر افضل مروت نے کہا کہ جب سے نئے سپرنٹنڈنٹ آئے ہیں انہوں نے بانی کی زندگی بھی اجیرن کی ہے، جیل سپرنٹنڈنٹ نے مجھے بانی پی ٹی آئی سے ملنے نہیں دیا۔ بانی سے ملاقات نہ کرانے پر سپرنٹنڈنٹ جیل کے خلاف پٹیشن دائر کروں گا۔انہوںنے کہاکہ مذاکرات کی میز پر آکر پی ٹی آئی نے لچک دکھائی ہے، بیرون ممالک عادل راجہ جیسے لوگوں سے پی ٹی آئی بدنام ہو رہی ہے۔ بیرون ممالک کچھ لوگ ڈالر کمانے کیلئے پی ٹی آئی کو استعمال کر رہے ہیں۔شیر افضل مروت نے کہا کہ بیرون ممالک کچھ لوگ پی ٹی آئی کی بدنامی کا باعث بن رہے ہیں، یہ بدبخت گمراہ کن پروپیگنڈا کررہے ہیں،بیرون ممالک کچھ لوگ میڈیا اور صحافیوں کو ٹارگٹ کر رہے ہیں۔