اسلام آباد،لاہور(نیوزڈیسک )الیکشن کمیشن کے مطابق آج رات 12بجے تک تمام سیاسی جماعتیں اپنی انتخابی مہم چلاسکتی ہیں اس کے بعد کوئی بھی جماعت پرانتخابی مہم نہیں چلاسکتی ہے ۔الیکشن کمیشن کے ذرائع نے بتایاہے کہ الیکشن مہم کی معیاد ختم ہونے پراگرکسی بھی جماعت نے پابندی کی خلاف ورزی کی تواس کے خلاف سخت کارروائی کی جائے گی ۔اس سے قبل این اے 122 میں انتخابی مہم جوبن پررہی ۔انتخابی مہم کےآخری روز حلقہ این اے122میں لاہور کا سیاسی کلچر جوبن پرنظرآیا۔ڈونگی گراؤنڈ سمن آباد میں مسلم لیگ ن کے جلسے میں نوجوانوں کےبھنگڑوں اور خواتین کے پُرجوش نعروں نے رنگ جما دیا۔اسٹیج پرخواتین رہنما سیلفیاں بناتی رہیں۔ سمن آبادڈونگی گراؤنڈمیں ہرطرف مسلم لیگ ن کےسبز پرچموں کی بہار۔لڑکےبالےٹولیوں کی شکل میں بھنگڑےڈالتےاور ڈانس کرتے ہوئے جلسہ گاہ پہنچتے رہے۔ جوق درجوق آنےوالی خواتین کی کلائیوں میں ہری ہری چوڑیاں۔ اپنےامیدوار کےحق میں ان کےپُرجوش نعروں نےماحول کو گرما دیا۔ سینوں پراسٹکرلگواتےننھےمنےپھول سےبچے،ٹوپیاں پہنےاور وکٹری کا نشان بناتےان بچوں کاجوش وخروش بھی دیدنی۔گلو بٹ کابھائی غنی بٹ بھی مونچھوں کوتاؤ دیتےہوئےجلسہ گاہ میں،ایک نوجوان گٹار لےکرپہنچ گیا۔