لاہور( این این آئی)سابق وزیر اعلی پنجاب اور پاکستان تحریک انصاف کے سینئر رہنما چوہدری پرویز الٰہی نے کہا ہے کہ ہر سچے پاکستانی کی طرح میں اور میری فیملی عمران خان کے ساتھ تھے اور رہیں گے،موجودہ سیاسی عدم استحکام تحریک انصاف کے انتخابی مینڈیٹ کو تسلیم نہ کرنے کا نتیجہ ہے،پاکستان میں سیاست کی کنجی آج بھی عمران خان کے ہاتھ میں ہے۔
اقوام متحدہ کی جنرل اسمبلی میں شہباز شریف نے کیا خطاب کرنا تھا اصل خطاب تو بانی پی ٹی آئی کا تھا، بانی پی ٹی آئی پاکستان کے ہی نہیں عالم اسلام کے لیڈر بن چکے ہیں،دنیا ان کی آواز سنتی ہے۔احتساب عدالت کے باہر میڈیا سے گفتگو کرتے ہوئے چوہدری پرویز الٰہی نے کہا کہ جتنا نقصان موجودہ حکومت نے کیا ہے شاید ہی کسی حکومت نے کیا ہو، آپ دیکھ لیں کسانوں کا کیا حال ہے، ان کا کوئی والی وارث نہیں ، دوسروں کے لئے اناج اگانے والوں کے اپنے گھروں کے چولہے بجھ رہے ہیں۔میرے سارے منصوبے ختم کر دئیے، عمران خان کی دشمنی میں صحت کارڈ منصوبہ ختم کر دیا جس سے ہزاروں غریب مریض روزانہ موت کے منہ میں جارہے ہیں، اس حکومت نے آکر بجلی مہنگی کر دی اور لوگوں کا جینا مشکل کر دیا ہے۔
انہوں نے کہا کہ عمران خان نے پہلے ہی بتا دیا تھا کہ اس طرح کا سلوک رکھا گیا تو ہمارے پاس اور کوئی چوائس نہیں،عمران خان عوام کے دلوں میں بستے ہیں، عوام خود ہی اپنے ہیرو کیلئے باہر نکلتی ہے۔ انہوںنے کہا کہ موجودہ سیاسی عدم استحکام تحریک انصاف کے انتخابی مینڈیٹ کو تسلیم نہ کرنے کا نتیجہ ہے،پاکستان میں سیاست کی کنجی آج بھی عمران خان کے ہاتھ میں ہے۔انہوںنے کہاکہ عمران خان اور تحریک انصاف کے رہنمائوں و کارکنوں پر جتنے مرضی جھوٹے پرچے کروا لیں لیکن اب ظلم کے بادل چھٹنے والے ہیں،عدلیہ پر پورا یقین ہے، انشا اللہ جلد ہی عمران خان دوبارہ عوام کے درمیان ہوں گے۔
