اسلام آباد(این این آئی)بانی پی ٹی آئی عمران خان کی بہن علیمہ خان کے رئوف حسن کے ساتھ واٹس ایپ پیغامات نے نیا پینڈورا باکس کھول دیا ۔نجی ٹی وی کے مطابق علیمہ خان نے واٹس ایپ سے رئوف حسن کو بشریٰ بی بی سے منسوب ایک پیغام بھیجاجس میں ان کے بانی پی ٹی آئی سے جیل میں ملاقات اور رونے کے واقعہ کی روداد بیان کی گئی ہے۔
علیمہ خان نے رئوف حسن کو پیغام میں کہاکہ بشریٰ بی بی کا یہ پیغام احمقانہ ہے،بشریٰ بی بی کا یہ ڈس انفارمیشن سیل لوگوں کو اکسا رہا ہے،اس پیغام کی تشہیر نہ کی جائے اور انہوں نے رئوف حسن کو ہدایت کی کہ بانی پی ٹی آئی کی ایسی کوئی بات بشریٰ بی بی سے نہیں ہوئی۔علیمہ خان نے بشریٰ بی بی سے منسوب جو پیغام رئوف حسن کو بھیجااس میں بانی پی ٹی آئی سے ملاقات کے احوال کا حوالہ دیا ، بشریٰ بی بی کے پیغام میں کہا گیا کہ جیل میں عمران خان کے ساتھ انہیں اکیلا ملنے نہیں دیا گیا۔
پیغام میں بانی پی ٹی آئی اور جیلر کے درمیان فرضی گفتگو کو بنیاد بنا کر عمران خان کی موت کا پروپیگنڈا کرنے کی کوشش کی گئی اور کہا گیا کہ مجھے (بانی پی ٹی آئی)کو پتہ ہے کہ تم (جیلر)پر مجھے مارنے کیلئے دبائو ڈالا جارہا ہے، اگرمجھے (بانی پی ٹی آئی)مارا گیا تو عوام تمہیں (جیلر)کو نہیں چھوڑیں گے۔بشریٰ بی بی سے منسوب پیغام میں آرمی چیف کو بھی نشانہ بنانے کی کوشش کی گئی اور کہا گیا کہ میں (بانی پی ٹی آئی)جانتا ہوں کہ میری یہ ساری باتیں سیدعاصم منیر اس وقت سن رہا ہے۔
