لاہور( این این آئی)لاہور ہائیکورٹ نے کم عمر لڑکیوں کا نکاح رجسٹر کرنے پر نکاح خواں اور نکاح رجسٹرار کے خلاف کارروائی کا حکم دے دیا ۔ لاہور ہائیکورٹ کے جسٹس انوار الحق ہنوں نے عظمت بی بی کی درخواست پر فیصلہ جاری کیا ۔ عدالت نے اپنے فیصلے میں کہا کہ ہائیکورٹ نے کمسن بچوں کی شادی روکنے کے حوالے سے واضح احکامات جاری کر رکھے ہیں ، نکاح کے وقت رجسٹرار ، نکاح خواںاور گواہوں کے پاس دلہن کی عمر کے متعلق دستاویزات ضروری ہیں ۔
عدالت نے اپنے تحریری فیصلے میں کہا کہ عدالتی حکم کے باوجود کمسن بچوں کی شادیاں جاری ہیں ،بظاہر نکاح رجسٹرار اور نکاح خواںعدالتی ہدایات کی پیروی نہیں کر رہے ،متعلقہ ادارے ایسے نکاح رجسٹرار اور نکاح خواںکے خلاف سخت کارروائی کریں ۔عظمت بی بی نے اپنی چودہ سالہ بیٹی کی بازیابی کے لیے درخواست دائر کی تھی۔
