پشاور (این این آئی)خیبرپختونخوا اسمبلی کے حلقے پی کے 33(ضلع کولائی پلاس)سے نومنتخب رکن صوبائی اسمبلی سردار محمد ریاض نے پاکستان تحریک انصاف میں شمولیت کا اعلان کر دیا۔انہوں نے صحافیوں کو بتایا کہ میں نے تحریک انصاف میں شمولیت اختیار کر لی ہے کیونکہ میرے حلقے میں لوگوں کو اب بھی بنیادی سہولیات میسر نہیں ہیں، اور میں چاہتا ہوں کہ کولائی پلاس خیبرپختونخوا کے خوشحال اور ترقی یافتہ اضلاع میں شامل ہو۔

اعلان سے قبل سردار محمد ریاض نے وزیر اعلی کے لیے نامزد علی امین گنڈاپور سے ملاقات کی تھی، انہوں نے امید ظاہر کی کہ نئی صوبائی حکومت ایسی ترقیاتی پروگرامز کا آغاز کرے گی، جس سے صوبے کے دور دراز علاقوں مثلا کولائی پلاس کے لوگوں کا معیار زندگی بہتر ہو سکے۔بالائی کوہستان، زیریں کوہستان اور کولائی پلاس سے صوبائی اسمبلی کی تین میں سے 2 نشستوں پر آزاد امیدوار منتخب ہوئے تھے، جنہیں پی ٹی آئی کی حمایت حاصل نہیں تھی، تاہم اب ان میں سے ایک نے تحریک انصاف میں شمولیت اختیار کر لی ہے۔