صوابی (این این آئی)سابق اسپیکر قومی اسمبلی اور این اے19 کے امیدوار اسدقیصر نے کہا ہے کہ ہمارا ایک سابق وزیر کہہ رہے ہیں کہ پی ٹی آئی والے یہ آزاد امیدوار ہیں اور انتخابات میں کامیابی کے بعد یہ لوگ میرے ساتھ آئیں گے لیکن وہ جان لیں کہ یہ آزاد امیدوار نہیں بلکہ تحریک انصاف کے کارکن اور امیدوار ہیں کوئی ایک بھی جرت نہیں کرے گا ہم سب نے حلف لیا ہوا ہے کہ ہم وہی کرینگے جو عمران خان کہے گا۔صوابی میں انتخابی جلسے سے خطاب کرتے ہوئے اسدقیصر نے کہا کہ نوشہرہ کے عوام پی ٹی آئی پی کو بھرپور شکست دینگے اور اس کی کوئی سیٹ نہیں ہوگی،خیبرپختونخوا اور مرکز میں پی ٹی آئی کی حکومت بنے گی۔
پی ٹی آئی رہنما اسدقیصر کا کہنا تھا کہ نوازشریف کہہ رہے ہیں کہ میرا فیصلہ ہوچکا ہے میں نے وزیراعظم بننا ہے لیکن اب وہ مطالبہ کررہے ہیں کہ مجھے دو تہائی اکثریت دے دو وہ مطالبہ عوام سے نہیں بلکہ خاص لوگوں سے کررہا ہے،نوازشریف صاحب میرے خیال میں آپ سبق نہیں سیکھ چکے ہیں آپ مسلسل غلطیاں کررہے ہیں۔اسدقیصر نے کہا کہ عمران خان نے تین بار صدر پاکستان بنانے کی آفر کی مگر پروٹوکول کی وجہ سے صدر پاکستان کا عہدہ نہیں لیا ۔
انہوں نے کہا کہ اب نوازشریف کہتے ہیں کہ میں ملکی معیشت سنبھالوں گا ،پوچھنا چاہتا ہوں شہبازشریف کے 16ماہ کی حکومت میں ان کا وزیرخزانہ کون تھا،اسحاق ڈار کی پاس وہ کون سا فارمولا ہے جو وہ شہباز حکومت میں استعمال نہ کرسکے اور نوازشریف حکومت میں استعمال کرینگے، یہ سارا ڈرامہ اور جھوٹ ہے صرف اقتدار حاصل کرنا چاہتے ہیں۔ انہوں نے کہا کہ میاں نوازشریف کی سلیکشن ہو چکی ہے۔ اسد قیصر نے کہا کہ چالیس سالہ افغان پرائی جنگ میں پاکستان کا زیادہ نقصان ہوا ہے سدقیصر کا کہنا تھا کہ عوام کو پہلی دفعہ صحت کارڈ کی سہولت ملی تھی وہ بھی چھین لی جیسے ہی ہماری حکومت آئے گی تو سب سے پہلے صحت کارڈ کو بحال کرینگے۔
