لاہور( این این آئی)استحکام پاکستان پارٹی کے مرکزی ترجمان فیاض الحسن چوہان کا ٹک ٹاک اکائونٹ بلاک ہوگیا۔رپورٹ کے مطابق پاکستان تحریک انصاف کے سوشل میڈیا ایکٹوسٹ نے مسلسل رپوٹنگ کے ذریعے آئی پی پی ترجمان فیاض الحسن چوہان کا ٹک ٹاک اکائونٹ بلاک کروا دیا ہے۔اس حوالے سے اپنے بیان میں آئی پی پی ترجمان فیاض الحسن چوہان نے کہا کہ میرا ٹک ٹاک اکائونٹ بلاک کروا کر پاکستان تحریک انصاف نے اپنی شکست تسلیم کی ہے، پی ٹی آئی کی سوشل میڈیا ٹیم اگرمیرا مقابلہ نہیں کرسکتی تو ریاست کا کیا کرے گی۔

فیاض الحسن چوہان نے کہا کہ میرا جرم سب سے پہلے پاکستان کا نعرہ لگا نا ہے، میرا جرم تحریکِ فساد فی الارض کو سوشل میڈیا پر بے نقاب کرنا ہے ، پی ٹی آئی میدان میں مقابلہ کرے گیدڑوں کی طرح راہ فراراختیارنہ کرے۔انہوں نے کہا کہ ابھی تو میں سوشل میڈیا پر بھرپور متحرک نہیں ہوں تو پی ٹی آئی کی ہوا اکھڑ گئی ہے، پاکستان کی بقا کی جنگ سوشل میڈیا، الیکٹرانک میڈیا اور سیاست کے میدان پر جاری رہے گی، بانی چئیرمین پی ٹی آئی کی ملک دشمن پالیسیوں کو بے نقاب کرنے پر میرا ٹک ٹاک اکاونٹ بلاک کروایا گیا۔پی ٹی آئی سوشل میڈیا ٹیم تگڑی رہے ، پاکستان کے لیے اور تحریکِ فساد فی الارض کے خلاف جنگ جاری رہے گی۔