اسلام آباد (این این آئی)پاکستانی کپتان بابر اعظم کو بھارتی بلے باز ویرات کوہلی نے اپنی انڈین جرسیاں تحفے میں دیں جس کی ویڈیو سامنے آنے کے بعد سوشل میڈیا پر ملے جلے تاثرات دیکھنے کو ملے۔تفصیلات کے مطابق آئی سی سی ورلڈکپ میں پاکستان اور بھارت کے درمیان ہونے والے میچ میں بھارتی کرکٹ ٹیم نے پاکستان کو یکطرفہ مقابلے کے بعد 7 وکٹوں سے شکست دی۔میچ کے بعد گراؤنڈ میں ویرات کوہلی کی جانب سے بابر اعظم کو اپنی دو جرسیاں تحفے میں دی گئیں جس کی ویڈیو انٹرنیشنل کرکٹ کونسل نے شیئر کی تو وہ سوشل میڈیا پر خاصی وائرل ہوئی۔

ویڈیو پر ناصرف پاکستانی صارفین نے تبصرے کیے بلکہ سابق کپتان اور سوئنگ کے سلطان وسیم اکرم نے بھی اسے نامناسب قرار دیا۔نجی ٹی وی کے شو میں گفتگو کرتے ہوئے وسیم اکرم نے کہا کہ جب میں نے تصویر دیکھی تو میں افسردہ ہوگیا، کیونکہ آج یہ دن نہیں تھا جب آپ (بابر) کوہلی کی جرسیاں لیتے۔وسیم اکرم نے کہا کہ اگر کرنا ہی ہے ”چاچا کے پتر”نے کہہ دیا ہے کہ کوہلی کی ٹی شرٹ چاہیے تو میچ کے بعد ڈریسنگ روم میں دی جا سکتی تھی۔ایک صارف نے غصے بھرے انداز میں لکھا کہ ذلت بھری شکست کے بعد آپ کا کپتان کوہلی سے اس کی شرٹ لے رہا ہے۔زین علی نامی صارف نے وسیم اکرم کی بات سے اتفاق کیا اور کہا میں بابر کی بہت عزت کرتا ہوں تاہم یہاں صورتحال مختلف تھی۔