کوئٹہ (این این آئی)سینئر وکیل عبدالرزاق شر قتل کیس میں عمران خان کی گرفتاری کے وارنٹ جاری کردیئے گئے۔تفصیلات کے مطابق کوئٹہ کی انسداد دہشت گردی عدالت (ون)نے ایڈووکیٹ عبدالرزاق شر قتل کیس میں عمران خان کے وارنٹ گرفتاری جاری کردیئے ہیں۔بلوچستان ہائیکورٹ کے چیف جسٹس نعیم افغان اور جسٹس عامر رانا نے درخواست کی سماعت کی،
پی ٹی آئی کے وکیل سید اقبال شاہ ایڈووکیٹ نے کہا کہ چیئرمین تحریک انصاف نے پہلے ہی اسلام آباد ہائیکورٹ سے قبل از گرفتاری ضمانت حاصل کررکھی ہے۔پی ٹی آئی وکلاء نے کہا کہ عمران خان کیخلاف جاری وارنٹ گرفتاری فوری منسوخ کئے جائیں، بلوچستان ہائیکورٹ نے تحریک انصاف کی دائر درخواست خارج کرتے ہوئے ریمارکس دیئے کہ عبدالرزاق شر ایڈووکیٹ قتل کی تفتیش کا سلسلہ جاری ہے، قتل کیس میں حکومت کی جانب جوائنٹ انویسٹی گیشن ٹیم تشکیل دے دی گئی ہے، شفاف انداز میں تفتیش کیلئے کیس پر اثرانداز نہیں ہونا چاہیے۔
