لاہور ( این این آئی) پاکستان کے نامور کرکٹرز نے 9مئی کے واقعات کی شدید مذمت اور افواج پاکستان کے شہدا کو خراج عقیدت پیش کیا ہے۔

کرکٹرز کا کہنا تھا کہ ایسا کرنے والے شرپسند عناصر فوج اور ملک کے دشمن ہیں، سانحہ 9 مئی کے ملزمان کے ساتھ ساتھ اس میں ملوث کرداروں کو بھی بے نقاب کر کے قانون کے کٹہرے میں لایا جائے۔کرکٹراحمد شہزاد نے اظہار خیال کرتے ہوئے کہا کہ شہید کی جو موت ہے وہ قوم کی حیات ہے، اس وطن کی مٹی سے محبت کے لئے جن شہدا نے اپنی جانیں قربان کی ہیں تمام محب وطن پاکستانی ان سے پیار کرنا اپنا فرض سمجھتے ہیں، شہدا کے خون کا ہم سب پر قرض ہے۔کرکٹر عمر اکمل کا کہنا تھا میں اور میری فیملی پاک فوج کے ساتھ کھڑی ہے، جن لوگوں نے یہ کام کیا ان سے یہ گزارش ہے کہ اس طرح کا کام دوبارہ مت کریں، پاک آرمی اور ہمارے سکیورٹی اداروں کی وجہ سے ہم لوگ آزادی سے گھومتے ہیں اور وہ ہمارے لئے اپنی جانوں کا نذرانہ دیتے ہیں، پاکستان زندہ باد، پاک فوج پائندہ باد۔