اسلام آباد (این این آئی)پاکستان ڈیمو کریٹک موومنٹ (پی ڈی ایم )کے ترجمان حافظ حمداللہ نے کہا کہ مذاکرات اس کے ساتھ کیے جاتے ہیں جو حتمی فیصلہ کے بعد اس کی پاسداری کرے ،فیصلے پر عمل کرے ،بات بات پر جھوٹ بولنے اور یوٹرن کے چمپئن عمران نیازی سے مذاکرات نہیں ہو سکتے ۔

اپنے ایک بیان میں پاکستان ڈیمو کریٹک موومنٹ (پی ڈی ایم )کے ترجمان حافظ حمداللہ نے کہا کہ مذاکرات اس کے ساتھ کیے جاتے ہیں جو حتمی فیصلہ کے بعد اس کی پاسداری کرے اور اس فیصلے پر عمل کرے قول و فعل میں تضاد اور بات بات پر جھوٹ بولنے والے شخص سے مذاکرات نہیں کیے جاتے ۔ انہوں نے کہا کہ یوٹرن خان نے پاکستان کی معیشت کا بیڑہ غرق کر دیا ہے اور اپنے دور اقتدار میں ملک میں عدم استحکام اور سیاسی مخالفین کیخلاف بے بنیاد اور جھوٹے مقدمات کے ذریعے انتقامی سیاست کی بنیاد رکھنے والا بھی مذاکرات کی بات کررہا ہے ۔ انہوں نے کہا کہ ملک میں عدم استحکام پیدا کرنے والے افراد کیساتھ کسی صورت بات چیت نہیں ہو سکتی ہمیشہ بات چیت اور مذاکرات کے دروازے سچے کھرے اور مخلص لوگوں کیلئے کھلے رکھے جاتے ہیں ۔حافظ حمداللہ نے کہا کہ جو لوگ ملک دشمن ایجنڈے پر عمل پیرا ہوں ان کیساتھ مذاکرات نہیں کیے جاتے ۔انہوں نے مزید کہا کہ عمران نیازی جھوٹوں کا چمپئن ہے ،اناڑی نے گندی اور غلیظ سیاست کو فروغ دیکر ملک میں عدم استحکام اور ملکی معیشت کا جنازہ نکال دیا ہے قوم ایسے مکار لوگوں کو کبھی معاف نہیں کریگی۔