ایڈیلیڈ( این این آئی) بنگلادیش کے کپتان شکیب الحسن نے بارش کے باعث رکنے والے میچ کے دوران بھارتی کپتان کی موجودگی میں گرائونڈ میں امپائر سے ہونے والی گفتگو کے بارے میں بتادیا۔شکیب الحسن سے صحافی نے سوال پوچھا کہ کیا آپ نے واقعی بارش کے بعد کھیلنے کی کوشش نہیں کی؟،

جس پر انہوں نے کہا کہ کیا ہمارے پاس کوئی آپشن تھا؟۔صحافی نے بنگلادیشی کپتان سے سوال کیا کہ کیا آپ نے انہیں سمجھانے کی کوشش کی؟ جس پر شکیب الحسن نے جواب دیا، کسے سمجھانے کی۔صحافی نے کہا کہ روہت شرما اور امپائرز کو، جس پر بنگلادیشی کپتان نے جواب دیا کہ کیا مجھ میں امپائر کو قائل کرنے کی صلاحیت ہے؟۔اس دوران صحافی نے عجیب سوال کیا کہ آپ امپائر سے بنگلا دیش کے دریائوں پر بحث کر رہے تھے۔صحافی کی یہ بات شکیب الحسن کے بالکل بھی سمجھ میں نہ آئی اور وہ حیرانی کا اظہار کرتے رہے جس کے بعد صحافی نے کہا کہ آپ گرائونڈ میں کس چیز سے متعلق بات کر رہے تھے۔شکیب الحسن نے صحافی کو بتایا کہ امپائر نے دونوں ٹیموں کے کپتانوں کو بلا کر ہدف، اوورز اور قوانین سے متعلق بتایا۔صحافی نے شکیب الحسن سے مزید پوچھا کہ آپ نے تمام چیزیں مان لیں جس پر انہیں کپتان نے جواب دیا کہ ہاں۔واضح رہے کہ بدھ کے روز بھارت کی جانب سے 185رنز کے ہدف کا بنگلادیش نے جارحانہ انداز میں تعاقب شروع کیا تھا تاہم بارش کے باعث میچ روک دیا گیا تھا جس کے باعث اوورز اورہدف میں تبدیلی کی گئی تھی۔ٹی ٹونٹی ورلڈ کپ سپر 12 مرحلے کے اس اہم میچ میں دلچسپ مقابلے بعد بھارت نے بنگلادیش کو 5 رنز سے ہرادیا تھا۔

موضوعات:شکیب الحسن