اسلام آباد(مانیٹرنگ ڈیسک)امریکی ریاست ٹیکساس کی سب سے بڑی کائونٹی سانتا فے کے سکول میں فائرنگ کے واقعہ میں 10طالبعلم جاں بحق ہوگئے ہیں ۔ اس اندوہناک واقعہ نے جہاں کئی امریکی والدین کی گودیں اجاڑی وہیں ایک پاکستانی خاندان بھی اپنی بیٹی کی اچانک اندوہناک موت سے نڈھال ہے۔ سانتافے کائونٹی کے سکول میں پیش آئے واقعہ میں پاکستانی طالب علم سبیکا شیخ بھی جان

کی بازی ہار بیٹھی ہیں۔ فائرنگ کا واقعہ سکول کی آرٹ کلاس میں پیش آیا جہاں ایک طالبعلم نے اندھا دھند فائرنگ کر کے اپنے ساتھی طالب علموں کو ہلاک کر دیا ۔ سبیکا کے والدین کو بیٹی کی موت کا سکول انتظامیہ کی رات گئے آنیوالی کال سے علم ہوا۔ سبیکا کے والد کا کہنا تھا کہ سبیکاخواتین کے لیے کچھ کرنا چاہتی تھی۔چھوٹی سی عمر میں بڑی بڑی باتیں کرتی تھی۔ انہوں نے بتایا کہ ٹی وی پر جب خبر دیکھی کے ٹیکساس کے ایک اسکول میں فائرنگ ہوئی ہے تو میں نے سبیکا کو فون کیا لیکن وہ نہیں اٹھا رہی تھی۔پھر میں نے وہاں کے لوکل کورڈینیٹر سے رابطہ کر کے بیٹی سے متعلق پوچھا تو انہوں نے بتایا کہ ابھی اس متعلق کچھ نہیں کہا جا سکتا۔ لیکن رات 11 بجے مجھے ان کی کال آئی اور انہوں نے سبیکا کے جاں بحق ہونے کی تصدیق کر دی۔ان کا مزید کہنا تھا کہ میری بیٹی بہت ذہین تھی۔وہ پاکستان کے لیے کچھ کرنا چاہتی تھی۔سبیکا کی اندوہناک موت نے اس کے بھائی پر بھی گہرا اثر ڈالا ہے اور وہ غم سے نڈھال ہے۔ سبیکا کے بھائی کا کہنا تھا کہ ہم نے عید کے بعد چھٹیوں کیلئے پلان کر رکھا تھا، سبیکا نے 8جون کو واپس آنا تھا ۔ سبیکا کے تایا نے میڈیا سے گفتگو کرتے ہوئے کہا کہ سبیکا نے بے شمار میڈلز حاصل کر رکھے تھےسبیکا کے کلاس فیلوز کو بھی سبیکا کی موتکا یقین نہیں ہو رہا۔اور ان کا کہنا تھا کہ سبیکا بہت ذہین طالب علم تھی۔واضح رہے کہ اس سے قبل بھی امریکہ میں تعلیمی اداروں میں فائرنگ کے واقعات میں کئی طالب علم اور سکول انتظامیہ کے افراد جان سے ہاتھ دھو بیٹھے ہیں اور اس معاملے پر امریکہ بھر میں ریلیز اور احتجاج کا سلسلہ بھی جاری رہ چکا ہے جس میں مظاہرین نے حکومت سے اسلحہ کے حصول پر پابندی کا مطالبہ کیا تھا۔

موضوعات:ٹیکساس سکول فائرنگ سبیکا شیخ