اسلام آباد (مانیٹرنگ ڈیسک) ویڈیو گیمز جو کہ ذہنی تفریح کا باعث ہیں مگر کچھ ویڈیو گیمز ایسی ہیں جو کھیلنے سے خطرناک نتائج برآمد ہوتے ہیں ایسی ہی ایک گیم بلیو وہیل ہے جو دو سو سے زائد نوجوانوں کو موت کی نیند سلا چکی ہے اور انٹرنیٹ اور سوشل میڈیا پر اس گیم سے متعلق بہت سی ہدایات جاری کی گئیں کہ اس گیم سے اجتناب کیا جائے۔ اس گیم میں مختلف ٹاسک دیے جاتے ہیں جنہیں پورا کرنا ہوتا ہے اور یہ ٹاسک انتہائی خطرناک ہوتے ہیں،

ان ٹاسک میں اپنے آپ کو زخمی کرنا بھی شامل ہوتا ہے، گزشتہ ہفتے پاکستان میں اس گیم سے متاثرہ بچے کی خبر آئی تھی جو کراچی کا رہائشی تھا مگر اس کے بعد اب ایک اور بچی کی بارے میں بتایا گیا ہے کہ جو بلیو وہیل گیم سے بری طرح متاثر ہوئی ہے اور ڈیرہ اسماعیل خان کی رہنے والی ہے۔ نجی ٹی وی چینل کا کہنا ہے کہ بلیو وہیل گیم کھیلنے والے بچی کو تشویشناک حالت میں خیبر پختونخوا کے خیبر ٹیچنگ ہسپتال میں علاج کے لیے رکھا گیا ہے۔ ڈاکٹر اعزاز جمال کے مطابق بچی نے سکول میں اپنے ساتھیوں سے بلیو وہیل نامی گیم کے متعلق سنا تو اس نے بھی یہ گیم کھیلنے کا فیصلہ کیا۔ واضح رہے کہ یہ بچی گیم کی آخری اسٹیج پر پہنچ چکی تھی، یہ گیم کھیلنے کے بعد بچی کے رویے میں عجیب و غریب تبدیلیاں رونما ہوئیں جو اس کے والدین نے محسوس کیں جس پر انہوں نے ڈاکٹروں سے رجوع کیا اور بتایا کہ بچی بلیو وہیل نامی گیم سے متاثرہ ہے۔ ڈاکٹر اعزاز جمال نے بتایا کہ بچی میں ڈپریشن کی علامات تھیں مگر ضروری علاج معالجہ کے بعد اسے گھر بھیج دیا گیا ہے۔واضع رہے کہ اب تک یہ گیم دو سو سے زائد نوجوانوں کو موت کی نیند سلا چکی ہے اور انٹرنیٹ اور سوشل میڈیا پر اس گیم سے متعلق بہت سی ہدایات جاری کی گئیں کہ اس گیم سے اجتناب کیا جائے۔ دوسری طرف پاکستان کے علاوہ بھارتی ریاست آندھرا پردیش میں ایک انجینئرنگ کے طالب علم نے خود کشی کر لی ہے وہاں کی پولیس طالب علم کی ہلاکت کے بلیو وہیل گیم سے تعلق پر تحقیقات کرنے میں مصروف ہے۔

موضوعات:بلیو وہیل