لاہور( این این آئی)پاکستان بار کونسل اور پنجاب بار کونسل نے وزیر اعظم ، وزیر اعلیٰ اور وزیر خزانہ سے مستعفی ہونے کا مطالبہ کرتے ہوئے آج ( بدھ) کو ملک گیر ہڑتال کااعلان کردیا جبکہ وکلاء رہنماؤں نے کہا ہے کہ سپریم کورٹ کے ساتھ کھڑے ہیں، حکمران جماعت کو عدالت کا وقار مجروح نہیں کرنے دیں گے۔وائس چیئرمین پاکستان بار کونسل احسن بھون نے وکلا تنظیموں کے دیگر رہنماؤں کے ہمراہ میڈیا سے گفتگو میں کہا کہ وکلا ء جمہوریت پر یقین رکھتے ہیں اور سب کا بلا امتیاز احتساب چاہتے ہیں۔

انہوں نے کہا کہ پانامہ لیکس کا فیصلہ کرپشن کے خاتمے کیلئے سنگ میل ثابت ہوگا۔احسن بھون نے مطالبہ کیا کہ جعلی دستاویزات فراہم کرنے پر حکمران خاندان کیخلاف جلد ٹرائل مکمل کیا جائے۔اگر جعلسازوں کو نہ پکڑا گیا تو مستقبل میں عدالتوں کے لئے مشکلات پیدا ہو سکتی ہیں۔وکلا رہنماؤں نے کہا کہ کر پشن کے خاتمے کیلئے سپریم کورٹ کے ساتھ کھڑے ہیں۔ پاناما لیکس کے معاملے پر وکلا کنونشن کے ساتھ ساتھ آل پارٹیز کانفرس بھی بلائی جائے گی۔انہوں نے مزید کہا کہ اسحاق ڈار نے ملکی معیشت کو مفلوج کرکے رکھ دیا، جعلی دستاویزات پیش کرنے پر سمری ٹرائل کیا جائے۔انہوں نے کہا کہ آج پاکستان بھر کے وکلا ء ہڑتال پر ہوں گے، اپوزیشن کی سیاسی جماعتوں سے بھی رابطوں میں ہیں، سیاسی جماعتوں نے وکلا ء کے ساتھ کھڑے ہونے کی یقین دہانی کرائی ہے۔میڈیا رپورٹس کے مطابق پاکستان بار کونسل نے آج ملک بھر میں ہڑتال کا اعلان کرتے ہوئے وزیراعظم، وزیراعلی پنجاب اور وزیر خزانہ سے مستعفی ہونے کا مطالبہ کردیا۔پاکستان بار کونسل کی جانب سے جاری اعلامیے میں کہا گیا ہے کہ جے آئی ٹی اور سپریم کورٹ کے خلاف مہم چلانے والوں پرتوہین عدالت کی کارروائی کی جائے، سپریم کورٹ کے خلاف محاذ آرائی کرنے والوں کے خلاف کارروائی ہونی چاہیے۔اعلامیے میں مزید کہا گیا ہے کہ پاکستان بار کونسل سپریم کورٹ کے ساتھ کھڑی ہے، حکمران جماعت کو عدالت کا وقار مجروح کرنے نہیں دیں گے۔

اعلامیے میں کہا گیا کہ جے آئی ٹی رپورٹ کی روشنی میں مدعا علیہان کیخلاف نیب کارروائی کرے جب کہ توقع ہے کہ سپریم کورٹ جے آئی ٹی رپورٹ کی روشنی میں ان کو نااہل کردے گی۔مزید کہا گیا کہ وزیراعظم نوازشریف، وزیراعلی پنجاب شہبازشریف اور وزیر خزانہ اسحاق ڈار فوری مستعفی ہوں۔

موضوعات:پاکستان بار کونسل ملک گیر ہڑتال نوازشریف کا استعفیٰ