اسلام آباد (این این آئی)وزیر داخلہ رانا ثناء اللہ خان نے کہا ہے کہ بے گناہ پولیس اہلکار کمال احمد کے سینے میں لگی گولی ثبوت ہے عمران خان دہشت گرد ہے،کمال احمدکے قاتل عمران خان، شیخ رشید اور ان کے حواری ہیں،عمران خان مارچ کی آڑ میں ملک میں
خانہ جنگی کی سازش کررہے ہیں۔ منگل کو وزارت داخلہ سے جاری بیان کے مطابق انہوں نے کہاکہ ’خونی مارچ ہوگا‘ کے اعلانا ت کرنے والوں سے حساب لیں گے، پولیس پر فائرنگ سے یہ بات ثابت ہوگئی ہے کہ یہ سیاسی سرگرمی نہیں اور یہ پرامن مارچ چاہتے ہی نہیں تھے۔ انہوںنے کہاکہ گالیاں برسانے والوں نے گولیاں برسانا شروع کردی ہیں، قانون کو ہاتھ میں لیاگیا ہے۔ انہوںنے کہاکہ کمال احمد کے قاتلوں کو قانون کے کٹہرے میں کھڑا کریں گے ۔ انہوں نے کہاکہ ملک میں خانہ جنگی، افراتفری ، فساد اور انتشار کو قانونی راستے سے روکیں گے۔ انہوںنے کہاکہ شہید پولیس اہلکار کے اہل خانہ کو شہدا پیکج دیں گے۔ انہوںنے کہاکہ شہید اہلکار کے اہل خانہ کی کفالت اور بچوں کی تعلیم کی ذمہ داری حکومت لے گی، عوام کے جان ومال کی حفاظت کا فرض پورا کریں گے۔ وزیر داخلہ نے شہید پولیس اہلکار کے اہل خانہ سے دلی تعزیت اور ہمدردی کا اظہار کیاہے۔ انہوں نے دعا کی کہ اللہ تعالی شہید کے درجات بلند فرمائے، اہل خانہ کو صبر جمیل دے۔
