اسلام آباد (این این آئی)یوم دفاع پاکستان کے موقع پر سربراہ پاک بحریہ ایڈمرل ظفر محمود عباسی نے کہا ہے کہ پاک بحریہ کے جہازوں نے آپریشن ”سومناتھ” کے دوران بے مثال بہادری سے دوارکا میں قائم بھارتی ریڈار اسٹیشن کو تباہ کیا۔

پاک بحریہ آج بھی دشمن کی سازشوں کا منہ توڑ جواب دینے کیلئے ہمہ وقت تیار ہے۔اتوار کو یوم دفاع پر اپنے پیغام میں انہوں نے کہاکہ چھ ستمبر کا دن ہماری تاریخ کا ایک سنہرا باب ہے۔ سربراہ پاک بحریہ نے کہاکہ یہ دن ہمیں پاکستانی قوم اور افواج کے غیر متزلزل عزم اور بہادری کی یاد دلاتا ہے۔ سربراہ پاک بحریہ نے کہاکہ یہ دن ہمارے شہداء اور غازیوں کی بے مثال بہادری اور قربانیوں کا غماز ہے جو دشمن کی عددی برتری کے باوجود ثابت قدم رہے اور اس کے ناپاک عزائم کو خاک میں ملا دیا۔ نیول چیف نے کہاکہ پاک بحریہ کی جراتمندانہ جنگی حکمتِ عملی اور پیشہ ورانہ قابلیت نے دشمن کو بچاؤ کی پالیسی اپنانے پر مجبور کیا۔ امیر البحر نے کہاکہ پاک بحریہ کے جہازوں نے آپریشن ”سومناتھ” کے دوران بے مثال بہادری سے دوارکا میں قائم بھارتی ریڈار اسٹیشن کو تباہ کیا۔ایڈمرل ظفر محمود عباسی نے کہا کہ پاک بحریہ کی آبدوز غازی نے بحر ہند میں اپنا تسلط قائم رکھتے ہوئے بھارتی بحری جنگی بیڑے کو بندرگاہ تک ہی مقید رکھا۔

سربراہ پاک بحریہ نے کہاکہ پاک بحریہ آج بھی دشمن کی سازشوں کا منہ توڑ جواب دینے کیلئے ہمہ وقت تیار ہے۔ نیول چیف نے کہاکہ آج، پاک بحریہ کے تمام آفیسرز اور جوان ملکی بحری سرحدوں کے دفاع کیلئے اپنے عزم کو دہراتے ہیں تاکہ آنے والی نسلوں کیلئے ایک ترقی یافتہ اور پر امید مستقبل مہیا کیا جا سکے۔

موضوعات:پاک بحریہ