جدہ(این این آئی) پاکستان نے اسلامی ممالک کے ماہرین پر مشتمل میڈیا ایڈوائزری بورڈ کے قیام کی تجویز پیش کرتے ہوئے کہا ہے کہ مسلم ممالک کا میڈیا ایڈوائزری بورڈ مستقل بنیاد پر قائم کیا جائے۔ بدھ کو جدہ میں سیکرٹری اطلاعات صبا محسن نے او آئی سی وزرائے اطلاعات کانفرنس سے خطاب کرتے ہوئے کہاکہ اسلام مخالف اشتعال انگیز مواد کا مقابلہ کرنے کیلئے میڈیا ماہرین کی ٹیم مقرر کی جائے۔

صبا محسن نے کہا کہ پاکستان القدس شریف کے اسلامی تقدس کے تحفظ کی مکمل حمایت کرتا ہے۔ سیکرٹری اطلاعات نے کہا کہ بھارتی افواج مقبوضہ کشمیر میں بدترین انسانی حقوق کی خلاف ورزیاں کررہی ہیں۔ صبا محسن نے کہاکہ مقبوضہ کشمیر میں مسلمانوں کو عبادات کی اجازت بھی نہیں دی جا رہی۔ صبا محسن نے کہا کہ او آئی سی کو کشمیری عوام اور روہینگیا کے مسلمانوں کے لئے بھی آواز اٹھانی چاہیےصبا محسن نے کہاکہ انسانی حقوق کے چیمپئنز ممالک میں مسلمانوں سے امتیازی سلوک روا رکھا جا رہا ہے۔ صبا محسن نے کہاکہ نائن الیون اگر اسلام کی ساکھ پر دھبہ ہے تو گوانتاناموبے اور ابو غریب بھی مغربی تشخص پر ایک داغ ہے۔ سیکرٹری اطلاعات نے کہا کہ اسلام فوبیا تحمل اور برداشت کی عالمی اقدار کی خلاف ورزی ہے۔ صبا محسن نے کہاکہ پائیدار ، مستحکم اور پرامن دنیا کے لئے ہمیں امن بقائے باہمی پر چلنا ہوگا۔

موضوعات:اسلامی ممالک او آئی سی پاکستان