اسلام آباد (این این آئی) وفاقی وزیر خزانہ سینیٹر محمد اسحق ڈار نے کہاہے کہ پاکستان اس وقت معاشی تاریخ کے مشکل ترین مرحلے سے گزر رہا ہے ، خرابی کی اصل ذمہ دار پاکستان تحریک انصاف کی حکومت ہے ۔ جمعہ کو قومی اسمبلی میں بجٹ تقریر کرتے ہوئے وزیر خزانہ نے کہا کہ اس وقت پاکستان معاشی تاریخ کے مشکل ترین مرحلے سے گزر رہا ہے، اس معاشی صورتحال کی خرابی کی اصل ذمہ دار پاکستان تحریک انصاف کی سابق حکومت ہے۔

انہوں نے کہاکہ موجودہ حالات گزشتہ حکومت کی معاشی بدانتظامی، بدعنوانی، عناد پسندی اور اقربا پروری کا شاخسانہ ہیں۔ وزیر خزانہ نے کہا کہ تحریک انصاف حکومت کی غلط معاشی پالیسی کی وجہ سے کرنٹ اکائونٹ خسارہ 17.5 ارب ڈالر سے تجاوز کر گیا، زرمبادلہ کے ذخائر میں تیزی سے کمی ہوئی، آئی ایم ایف پروگرام کی تکمیل پاکستان کے لئے انتہائی اہم تھی لیکن تحریک انصاف کی حکومت نے اس نازک صورتحال میں حالات کو جان بوجھ کر خراب کیا،

پٹرول اور بجلی کی قیمتوں میں سبسڈی کے ذریعے کمی کر دی، ایسے اقدامات اٹھائے جو کہ آئی ایم ایف کی شرائط کی خلاف ورزی تھی، سابقہ حکومت کے وزیر خزانہ نے فون کر کے دو صوبائی وزرائے خزانہ پر شدید دبائو ڈالا کہ وہ اپنا قومی فریضہ انجام نہ دیتے ہوئے آئی ایم ایف کے پروگرام کو سبوتاژ کریں، یہ اقدامات نئی حکومت کے لئے بارودی سرنگیں بچھانے کے مترادف تھے جن سے مالی خسارے میں اضافہ ہوا اور پاکستان اور آئی ایم ایف کے تعلقات کو شدید نقصان پہنچایا جبکہ چور مچائے شور کے مترادف ان تمام حالات کی ذمہ داری نئی حکومت پر ڈالنے کی کوشش کی، انہیں یقین تھا کہ معاشی حالات اتنے خراب ہو جائیں گے کہ کوئی پاکستان کو ڈیفالٹ سے نہیں بچا سکے گا، یہ انتہائی غیر ذمہ دارانہ طرز عمل تھا، تاہم وزیراعظم شہباز شریف اور اتحادی جماعتوں کے بھرپور تعاون سے ایسے معاشی فیصلے کئے جا رہے ہیں جن کی وجہ سے ان ملک دشمن لوگوں کے عزائم پورے نہیں ہو پا رہے۔

موضوعات:اسحاق ڈار