ممبئی (این این آئی)بالی ووڈ کنگ شاہ رخ خان کو ممبئی ائیرپورٹ پر سیلفی لیتے مداح کا ہاتھ جھٹکنا مہنگا پڑ گیا۔بھارتی میڈیا کے مطابق شاہ رخ ان دنوں ہدایت کار راج کمار ہیرانی کی فلم ڈنکی کی شوٹنگ میں مصروف ہیں۔حال ہی شاہ رخ کو اداکارہ تاپسی پنو اور فلم کی کاسٹ کے ہمراہ کشمیر سے شوٹنگ کے بعد ممبئی ائیر پورٹ پر دیکھا گیا جس کی ایک ویڈیو سوشل میڈیا پر وائرل ہوگئی۔

ویڈیو میں دیکھا جاسکتا ہے کہ ائیرپورٹ پر جب شاہ رخ کو دیکھ کر مداحوں نے سیلفی لینے کی کوشش کی تو اداکار نے فورا ہاتھ بڑھا کر ایک مداح کا ہاتھ نیچے کردیا بعد ازاں سکیورٹی حصار میں اداکار کو گاڑی تک پہنچایا گیا۔سوشل میڈیا ویڈیو وائرل ہوئی تو کنگ خان کے مداحوں نے انہیں آڑے ہاتھوں لیتے ہوئے اداکار کے بائیکاٹ کا مطالبہ کردیا۔

وائرل ویڈیو کے کمنٹس میں تبصرہ کرتے ہوئے ایک صارف نے لکھا کہ اس مداح نے تو شاہ رخ کو ہاتھ بھی نہیں لگایا تھا پھر بھی اتنا برا رویہ۔ایک اور صارف نے لکھا کہ یہ ہماری ہی وجہ سے اسٹارز بنتے ہیں اور پھر ہمارے ساتھ ہی ایسا کرتے ہیں۔ایک صارف نے میڈیا پر بھی تنقید کی اور کہا کہ میڈیا والے کہتے ہیں کہ شاہ رخ بہت عاجز ہیں، انہیں یہ ویڈو دکھا ئواور بتائو کتنا عاجز ہے جبکہ ایک صارف نے کنگ خان پر سلمان خان کو ترجیح دے دی۔

موضوعات:شاہ رخ خان