اسلام آباد(آئی این پی)پاکستان تحریک انصاف کے چیئرمین عمران خان نے پی ایس ایل کیلئے نیک تمناؤں کا اظہار کرتے ہوئے کہا ہے کہ بین الاقوامی کرکٹ کی پاکستان میں واپسی قوم کی دیرینہ خواہش ہے،میری دعائیں پی ایس میں حصہ لینے والی تمام ٹیموں اور کھلاڑیوں کیساتھ ہیں،سیاسی مصروفیات کے باعث میچ دیکھنے کیلئے شاید وقت نہ نکال پاؤں گا،جو ٹیم بھی بہترین کارکردگی دکھائے گی اسی کیساتھ جیت کی خوشیاں منائیں گے۔منگل کو چیئرمین پی ٹی آئی عمران خان

نے اپنے ٹوئٹر پیغام میں کہا کہ میری دعائیں پی ایس میں حصہ لینے والی تمام ٹیموں اور کھلاڑیوں کیساتھ ہیں، بین الاقوامی کرکٹ کی پاکستان میں واپسی قوم کی دیرینہ خواہش ہے، پاکستان میں کھیلوں خصوصاً کرکٹ کا فروغ ہماری اولین ترجیحات میں سے ہے۔ عمران خان نے مزید کہا کہ اقتدار میں آئے تو کرکٹ کے ڈھانچے کو مضبوط اور کھیل میں مزید نکھار لائیں گے، ڈومیسٹک کرکٹ میں بھی اسی کی ترویج اہم ہے، میری نیک تمنائیں کھیل میں شریک تمام ٹیموں کے ساتھ ہیں، سیاسی مصروفیات کے باعث میچ دیکھنے کیلئے شاید وقت نہ نکال پاؤں، بہرحال جو ٹیم بھی بہترین کارکردگی دکھائے گی اسی کیساتھ جیت کی خوشیاں منائیں گے۔