اسلام آباد (این این آئی) بھارت اور ازبکستان کے ٹینس کھلاڑیوں نے پاکستان میں ہونے والے ایشین ٹینس ٹور میں شرکت کی تصدیق کردی ہے جبکہ ایران نے انٹرنیشنل ٹینس فیڈریشن (آئی ٹی ایف) سے ڈیوس کپ کو پاکستان سے دوسری جگہ منتقل کرنے کی درخواست کی ہے۔پاکستان ٹینس فیڈریشن (پی ٹی ایف) پرامید ہے کہ آئی ٹی ایف، ایران کے خلاف ہونے والے ڈیوس کپ کے اعلان کردہ شیڈول کے تحت انعقاد کو برقرار رکھے گی۔
چمپئن شپ فروری 2017 میں اسلام آباد میں متوقع ہے تاہم ایران نے آئی ٹی ایف سے درخواست کی ہے کہ سیکیورٹی معاملات کے باعث ایونٹ کو پاکستان سے منتقل کردیا جائے۔آئی ٹی ایف ٗایران کی درخواست پر اگلے ہفتے فیصلہ سنا دے گی۔پی ٹی ایف کے صدر سلیم سیف اللہ خان کے مطابق ڈیوس کپ کو منتقل کرنے کا کوئی سوال ہی پیدا نہیں ہوتا جو ان کے آزادانہ سیکیورٹی ماہرین کی جانب سے چھان بین کے بعد ہمیں دیا جا چکا ہے۔
انھوں نے کہا کہ میں نہیں سمجھتا کہ کوئی ایسی وجہ موجود ہے کہ آئی ٹی ایف کا فیصلہ ایران کے حق میں جائے۔حکومت کی جانب سے پی ٹی ایف کو دی جانے والی امداد پر بات کرتے ہوئے سلیم سیف اللہ کا کہنا تھا کہ وفاقی حکومت فیصلہ کرچکی ہے کہ وہ ملک میں کھیل کی بہتری کیلئے 5 کروڑ دے گی۔
