پشاور(این این آئی)عوامی نیشنل پارٹی خیبرپختونخوا کے صدر ایمل ولی خان نے صوبے کے قومی اسمبلی کے خالی نشستوں پر ضمنی انتخابات کے بائیکاٹ کا اعلان کرتے ہوئے کہا ہے کہ ایک نام نہاد سیاسی جماعت نے انتخابی سیاست کو مذاق بنایا ہوا ہے،

پہلے ایک امیدوار کو کئی نشستوں پر کھڑا کرکے قوم کے اربوں روپے ضائع کئے گئے،ایک طبقہ سیاست میں عدم برداشت پیدا کرنے اور پارلیمنٹ کی بے توقیری کی کوششوں میں مصروف ہے۔ انہوںنے کہاکہ موجودہ معاشی حالات کو دیکھتے ہوئے تین مہینوں کیلئے قوم کے کروڑوں خرچ کرنا زیادتی ہوگی۔ اے این پی نے 18حلقوں کیلئے امیدواران کا اعلان کیا تھا، ہر وقت انتخابات کیلئے تیار ہیں۔ عام انتخابات کا اعلان کل بھی ہو تو اے این پی بھرپور قوت کے ساتھ میدان میں ہوگی۔ایمل ولی خان نے کہا کہ پی ڈی ایم اور پاکستان پیپلزپارٹی کی جانب سے بھی انتخابات میں حصہ نہ لینے کی درخواست کی گئی تھی۔تمام اتحادیوں کے انتخابات میں حصہ نہ لینے کے بعد اے این پی نے مشاورت سے فیصلہ کرلیا۔ کارکنان و ذمہ داران کا شکریہ ادا کرتے ہیں جنہوں نے قلیل وقت میں بھرپور انتخابی مہم چلائی۔