اسلام آباد(آن لائن)صدر مملکت ڈاکٹر عارف علوی نے اسلام آباد لوکل گورنمنٹ ترمیمی بل بغیر دستخط کے حکومت کو واپس بھجوا دیا،صدر نے یہ بل آئین کے آرٹیکل 75 کی شق (1) (b) کے تحت واپس بھجوایا، صدر مملکت عارف علوی نے بل پر دستخط نہ کرنے کی وجوہات اور اعتراضات کا ذکر کیا،صدر نے کہا کہ

اس سے بلدیاتی انتخابات میں مزید تاخیر ہو گی، وفاقی حکومت کے عجلت میں اٹھائے گئے اقدامات کے نتیجے میں انتخابی عمل میں دو بار تاخیر ہوئی جو کہ جمہوریت کے لیے مثبت نہیں،وفاقی حکومت کے مندرجہ ذیل غلط اقدامات کی وجہ سے اسلام آباد کیپیٹل ٹیریٹری (آئی سی ٹی) میں انتخابات نہیں ہو سکے،50 یونین کونسلوں کی حد بندی مکمل ہونے کے بعد، الیکشن کمیشن آف پاکستان (ECP) نے 31 جولائی 2022 کو ICT میں مقامی حکومتوں کے انتخابات کا فیصلہ کیا۔صدر نے اپنے اعتراضات میں کہا کہ پولنگ کی تاریخ کے اعلان کے باوجود وفاقی حکومت نے یونین کونسلوں کی تعداد 50 سے بڑھا کر 101 کر دی، جس کے نتیجے میں انتخابات التوا کا شکار ہوئے،101 یونین کونسلوں کی حد بندی کے بعد الیکشن کمیشن آف پاکستان نے 31 دسمبر 2022 کو آئی سی ٹی میں انتخابات کرانے کا فیصلہ کیا۔ موجودہ بل کا سیکشن 2 آئی سی ٹی میں 125 یونین کونسلوں کا ذکر کرتا ہے۔ اس لیے 31 دسمبر 2022 کو ہونے والے انتخابات دوبارہ ملتوی کر دیئے گئے ہیں۔یاد رہے کہ موجودہ بل کے سیکشن 3 کے مطابق انتخابات کے شیڈول کے اعلان کے بعد میئر اور ڈپٹی میئر کے انتخابات کا طریقہ تبدیل کر دیا گیا ہے،وفاقی حکومت نے اسلام آباد لوکل گورنمنٹ ترمیمی بل دونوں ایوانوں سے پاس کر کے منظوری کے لئے صدر مملکت عارف علوی کو بھجوایا تھا تاہم صدر مملکت نے ترمیمی بل پر بغیر دستخط کے حکومت کو واپس بھجوا دیا۔