لاہور، کراچی(آئی این پی)ٹی ٹوئنٹی ورلڈکپ کے فائنل میں پاکستان کی انگلینڈ کے ہاتھوں شکست پر بھارتی میڈیا پر کئی سوال اٹھائے گئے لیکن ان سوالات کے جوابات میں پاکستانی شائقین کے کرارے جواب نے بھارتی میڈیا کو دنگ کردیا،آسٹریلیا کے میلبرن گرائونڈ میں
بھارتی صحافی کی جانب سے پاکستان کی شکست کے بعد اسٹیڈیم سے نکلتے شائقین کو روک کر ان کی رائے پوچھی گئی،جس کے جواب میں پاکستانی فین نے کہا کہ ہم یہاں سے بالکل مایوس ہوکر نہیں جارہے کیوں کہ کسی ایک کو جیتنا تھا انگلینڈ جیت گئی لیکن ہم خوش ہیں،پاکستانی فین نے صحافی سے کہا کہ میرے پاس ایک شعر ہے اگر آپ کی اجازت ہوتو سنادیتا ہوں لیکن مجھے نہیں پتا آپ اس کو جانے دیں گے یا نہیں ، بات یہ ہے کہ اب بات نہیں ہوتی ، فائنل کے خواب دیکھنا اچھی بات ہے لیکن فائنل کھیلنا سب کی اوقات نہیں ہوتی،پاکستانی فین کا مزید کہنا تھا کہ ہم خوش ہیں مایوس نہیں کیوں کہ ہم فائنل تک پہنچے ہیں۔دوسری جانب سابق کپتان شاہد آفریدی نے کہاہے کہ پی سی بی کو اب شاہین شاہ آفریدی کو بہت احتیاط سے چلانا ہوگا،نجی ٹی وی سے گفتگو کرتے ہوئے شاہد آفریدی نے بتایا کہ شاہین اب ریسٹ پر ہے کیوں کہ شاہین کے گھٹنے کی انجری کے بعد ایک بار پھر اسی جگہ زور آیا ہے،انہوں نے کہا میرا خیال ہے کہ اب شاہین کو پورے 2 سے 3 ماہ ریکوری کے لیے لینا چاہئیں، اسے اپنی فیلڈنگ میں خیال رکھنا چاہیے۔
