دیامر (این این آئی)گلگت بلتستان کے ضلع دیامر میں شرپسندوں کے ہاتھوں گرلز اسکول کو آگ لگا دی گئی، تاہم اسکول کی مرمت کا کام شروع کر دیا گیا ۔واقعیہ کا مقدمہ نامعلوم شر پسندوں کے خلاف درج کر کے علاقے میں واقع دیگر اسکولوں کی سیکیورٹی بڑھا دی گئی ہے۔چیف سیکرٹری گلگت بلتستان کے مطابق داریل میں متاثرہ اسکول کی مرمت کا کام شروع کر دیا گیا ہے، ایک ہفتے میں اسکول کو فعال کر دیا جائے گا۔پولیس کے مطابق داریل میں گرلز مڈل اسکول کو آگ لگانے کے بعد علاقے میں دیگر اسکولوں کی سیکیورٹی سخت کر دی گئی ہے اور گرلز اسکول کو آگ لگانے کے واقعے میں ملوث شرپسندوں کی تلاش جاری ہے،اسکول کو آگ لگانے کا مقدمہ نامعلوم شر پسندوں کے خلاف درج کر لیا گیا ۔شرپسندوں نے گزشتہ روز 7 کمروں پر مشتمل اسکول کو آگ لگا دی تھی، جس سے عمارت متاثر ہوئی تھی اور فرنیچر جل گیا تھا۔