کراچی (مانیٹرنگ، این این آئی) تحریک انصاف کے سربراہ عمران خان پر حملے کے خلاف پی ٹی آئی کراچی نے احتجاج مارچ کیا،مارچ کے شرکا کو پولیس نے ریڈ زون میں داخلے سے روک دیا،مظاہرین پر لاٹھی چارج اور آنسو گیس کی شیلنگ کی،پولیس کارروائی سے علاقہ میدان جنگ بن گیا،پولیس نے کئی کارکنان کو حراست میں لے لیا،
پولیس نے مظاہرین کو منتشر کردیا،ہنگامہ آرائی اور احتجاج سے شاہراہ فیصل اور اطراف کی سڑکوں پر بدترین ٹریفک جام ہوگیا،لاتعداد گاڑیوں سمیت ایمبولینسز پھنس گئیں، احتجاج کے دوران شیلنگ اور لاٹھی چارج کے نتیجے میں تحریک انصاف کے رکن سندھ اسمبلی راجہ اظہر زخمی ہو گئے، انہیں طبی امداد کے لئے جناح ہسپتال لے جایا گیا انتظامیہ کا کہنا ہے کہ ان کی ٹانگ میں گولی لگی ہے، طبی امداد دے دی گئی ہے، شہریوں کو اپنے گھر پہنچنے میں مشکلات ہوئیں،پی ٹی آئی نے مرکزی قیادت کی ہدایت تک احتجاج جاری رکھنے کا اعلان کیا ہے۔ تحریک انصاف کے سربراہ عمران خان پر حملے کے خلاف پی ٹی آئی نے انصاف ہاؤس سے احتجاجی مارچ نکالا۔ریلی میں پی ٹی آئی رہنماؤں اور کارکنان کی بڑی تعداد موجود تھی۔مارچ کے شرکا احتجاج کرتے ہوئے شاہراہ فیصل کے دونوں ٹریکس پر آگئے۔مارچ کے شرکا سے خطاب میں پی ٹی آئی کراچی کے صدر بلال غفار نے کہا کہ ہم نے کبھی تشدد کی سیاست نہیں کی۔ ہم پرامن احتجاج کررہے ہیں۔احتجاج ہمارا آئینی حق ہے۔ کل ہم نے 16 مقامات پر پر امن احتجاج کیا۔ امپورٹڈحکومت کے دن پورے ہوچکے ہیں۔ کل ہماری ریڈ لائن کراس کی گئی۔رانا ثنا کل کے واقعے کا براہ راست ذمہ دار ہے۔رانا ثنا ٹی وی پر بدمعاش بنا ہوتا ہے۔جب تک ہمارے مطالبات نہیں مانے جاتے احتجاج جاری رہے گا۔
پی ٹی آئی مارچ کے شرکا نے میٹروپول کی طرف جانے کی کوشش کی تو پولیس نے رکاوٹیں لگا کر سڑک کو بند کردیا۔پی ٹی آئی رہنماؤں اور پولیس میں مذاکرات ناکام ہوگئے۔مارچ کے شرکا جیسے ہی آگے بڑھے تو پولیس نے لاٹھی چارج اور شیلنگ شروع کردی جس سے بھگدڑ مچ گئی۔پولیس کے ساتھ پی ٹی آئی کارکنان کا تصادم ہوا۔پولیس نے کئی کارکنان کو حراست میں لے لیا۔
احتجاج اور ہنگامہ آرائی کے سبب اطراف کی شاہراہوں پر بدترین ٹریفک جام ہوگیا۔گاڑیوں کی طویل قطاریں لگ گئیں۔عوام کو شدید مشکلات کا سامنا کرنا پڑا۔پی ٹی آئی سندھ کے صدر و سابق وفاقی وزیر علی زیدی نے کراچی میں پی ٹی آئی کارکنان پر لاٹھی چارج اور شیلنگ کی مذمت کی ہے۔پر امن کارکنان پر لاٹھی چارج اور شیلنگ کی پر زور مذمت کرتا ہوں۔پر امن احتجاج میں شریک خواتین، بچوں اور کارکنان پر شیل برسائے جارہے ہیں۔
علی زیدی نے کہا کہ ہمیں مسلسل ریاستی دہشتگردی کا نشانہ بنایا جارہا ہے۔ملک سے اب جمہوریت ختم ہو چکی ہے۔یہ امپورٹڈ حکومت اب پر امن عوام سے بھی خوفزدہ ہے۔یہ تحریک ظلم اور جبر سے نہیں روکی جا سکتی۔یہ تشدد کریں گے تو عوامی ردعمل ضرور آئے گا۔علی زیدی نے کہا کہ بے ضمیر امپورٹڈ حکومت کے دن گنے جا چکے ہیں۔عمران خان کے مطالبے تک ہمارا احتجاج جاری رہے گا۔شاہراہِ فیصل پر موجود کارکنان کو خراج تحسین پیش کرتا ہوں۔
اپوزیشن لیڈر سندھ اسمبلی حلیم عادل شیخ کی کراچی میں پی ٹی آئی کے احتجاج پر پولیس گردی کی مذمت کی ہے۔پرامن احتجاج پر پولیس گردی کی ہے۔حلیم عادل شیخ نے کہا کہ سندھ کی غلام پولیس اپنے آقاں کو خوش کرنے میں مصروف ہے۔امپورٹڈ حکومت کی سہولتکار سندھ حکومت غلامی کا قرض اتارنے میں مصروف ہے۔انقلاب سے تخت زردار بھی اب جاتا ہوا دکھائی دے رہا ہے۔سندھ کی غلام پولیس اور غلام وزرا سے حساب ضرور لیں گے، حلیم عادل شیخ نے کہا کہ آئی جی سندھ نوکری کی بجا بھرپور غلامی پر اتر آئے ہیں۔بعدازاں پولیس نے مظاہرین کو منتشر کردیا۔
