مقبوضہ بیت المقدس (این این آئی)اسرائیل نے مقبوضہ مغربی کنارے پر مزید 4ہزار غیر قانونی بستیاں تعمیر کرنے کا منصوبہ بنالیا۔خلیجی میڈیا کے مطابق اسرائیلی وزیر داخلہ نے مقبوضہ مغربی کنارے پر 4ہزار غیر قانونی بستیاں بنانے کے منصوبے کی تصدیق کی ہے
جس کی جلد منظوری دی جائے گی۔ٹوئٹر پر جاری بیان میں مقبوضہ مغربی کنارے پر غیر قانونی بستیوں کی تعمیر کے حامی اسرائیلی وزیر داخلہ نے کہا کہ 4ہزار بستیوں کی تعمیر کے منصوبے کی منظوری کیلئے پلاننگ کمیٹی کا اجلاس آئندہ ہفتے ہوگا جبکہ اسرائیلی وزیر نے ان غیر قانونی بستیوں کی تعمیر کو ضروری چیزوں کی بنیاد قرار دیا۔خلیجی میڈیا کے مطابق اسرائیلی اخبار کا کہنا ہے کہ 1452بستیوں کی تعمیر کے سلسلے میں سول انتظامیہ اور فوجی حکام جمعرات کے روز میٹنگ کریں گے جبکہ دیگر 2536یونٹس کی تعمیر کی منظوری وزیر دفاع کی جانب سے دی جائے گی۔غیر ملکی میڈیا کے مطابق اگر اسرائیل کی جانب سے 4ہزار بستیوں کی تعمیر کے منصوبے کی منظوری دی گئی تو یہ امریکی صدر جوبائیڈن کے اقتدار میں آنے کے بعد سب سے بڑی تعمیرات ہوں گی جب کہ وائٹ ہائوس مسئلے کے دو ریاستی حل کیلئے مغربی کنارے پر غیر قانونی بستیوں کی تعمیرات کا مخالف ہے۔اس سلسلے میں اسرائیل میں تعینات امریکی سفیر تھامس نائیڈز نے کہا ہے کہ جوبائیڈن انتظامیہ اس سلسلے میں مکمل طور پر واضح کرچکی ہے کہ وہ مزید تعمیراتی سرگرمیوں کی سخت مخالفت کرے گی۔
