لاہور( این این آئی)وزیراعلی سیکر ٹریٹ جہانگیر ترین گروپ کے مسائل حل کرنے کیلئے حرکت میں آگیا، ایوان وزیراعلی کی جانب سے ہدایت جاری کی گئی ہیں کہ ترین گروپ کے اراکین کے مسائل ترجیحی بنیادوں پر حل کئے جائیں۔ذرائع کے مطابق وزیر اعلی سیکر ٹریٹ نے

جہانگیر ترین گروپ کے اراکین اسمبلی کے اضلاع کی بیوروکریسی کو مسائل ہفتوں یا دنوں میں نہیں بلکہ گھنٹوں میں حل کرنے کا کہہ دیا ہے ،متعلقہ اضلاع کے ڈپٹی کمشنرز اور ڈی پی اوز کو بھی ترجیحی بنیادوں پر کام نمٹانے کی ہدایت کی گئی ہے۔حکام کو مسائل کی رپورٹ روزانہ کی بنیاد پر ایوان وزیر اعلی بھجوانے کے احکامات دیئے گئے ہیں۔معاملات کو سدھارنے کیلئے پنجاب کے وزیر تعلیم ڈاکٹر مراد راس ترین گروپ کے ساتھ معاملات سلجھانے کیلئے متحرک ہیں جبکہ ان کی آئندہ چوبیس گھنٹوں میں ایک اور ملاقات بھی متوقع ہے۔ یہ امر قابل ذکر ہے کہ ترین گروپ کے دو رہنما وزیر اعلی آفس آئے تھے جہان ان کی پرنسپل سیکرٹری اور دیگر حکام سے ملاقات ہوئی جس کے دوران ارکان کے حلقوں کے مسائل حل کرنے سمیت دیگر امور پر مفصل بات چیت ہوئی۔