اسلام آباد (مانیٹرنگ ڈیسک /این این آئی)نجی ٹی وی پروگرام میں اپوزیشن لیڈر قومی اسمبلی و صدر مسلم لیگ ن میاں شہباز شریف نے حکومتی اتحادی جماعت کے ساتھ معاملات طے پانے کا دعویٰ کیا ہے۔ شہباز شریف کا کہنا تھا کہ آصف علی زرداری نے متحدہ قومی موومنٹ سے

معاملات طے پا جانے کی خوشخبری دی ہے چودھری برادران منجھے ہوئے سیاستدان ہیں وہ پاکستان کا وسیع تر مفاد دیکھ کر ہی فیصلہ لیں گے ۔ امید ہے وہ عوام اور پاکستان کا مفاد دیکھ کر متحدہ اپوزیشن کے ساتھ جائیں گے ۔دوسری جانب پاکستان مسلم لیگ (ن)کے صدر و قائد حزب اختلاف شہبازشریف نے سندھ ہائوس اور ارکان قومی اسمبلی کے گھروں پرحملوں کی شدید مذمت کرتے ہوئے کہا ہے کہ سندھ ہائوس اور اپنے ہی ارکان اسمبلی پر حملے تحریک عدم اعتماد کی کامیابی کی دلیل ہے ،سندھ ہائوس اور ارکان قومی اسمبلی پر حملے اعتراف ہے کہ عمران نیازی ہار چکے ہیں ۔ اپنے بیان میں انہوں نے کہا کہ ارکان قومی اسمبلی پر حملے عمران نیازی کی ملک کو خانہ جنگی میں دھکیلنے کی سازش ہے ،ڈوبتی سیاست بچانے کے لئے عوام میں تصادم منفی ، مجرمانہ اور غیرآئینی سوچ ہے ،عمران نیازی پارلیمنٹ، پی ٹی وی سمیت سرکاری عمارتوں پر حملوں کے کنٹینر والے موڈ میں آگئے ہیں ،اسمبلی میں آئین اور جمہوری انداز میں مقابلہ کرنے کے بجائے پتھر برسانا ، گیٹ توڑنا فسطائی ذہنیت اور شکست کی نشانی ہے ۔ انہوں نے کہا کہ حکومت لاقانونیت سے باز رہے، کسی سیاسی رہنما، کارکن یا سرکاری عمارات کا نقصان ہوا تو عمران نیازی سے حساب لیں گے۔