کراچی ،اسلام آباد (این این آئی ، آن لائن)پاکستان تحریک انصاف نے کسی بھی انتشار اورحملے سے بچنے کے لیے سیلف ڈیفنس فورس تیار کرلی۔تفصیلات کے مطابق موجودہ سیاسی بحران میں پاکستان تحریک انصاف نے سیلف ڈیفنس فورس تیار کرلی۔
اس حوالے سے پی ٹی آئی سینر نائب صدر سندھ راجہ اظہر نے ویڈیو جاری کردی ہے۔راجہ اظہر نے ویڈیو پیغام میں کہا ہے کہ کسی بھی انتشار اور حملہ سے بچنے کیلئے سیلف ڈیفنس فورس تیار کی، کراچی سے سو سے زائد جوان اس فورس کا حصہ ہیں۔پی ٹی آئی سینر نائب صدر سندھ نے کہا کہ پر امن لوگ ہیں تاہم اگر مخالفین نے حملہ کیا تو بھرپور جواب دیں گے، پی پی کارکنان گورنر ہاوس یا قصر ناز گئے تو ہم سی ایم ہاوس اور بلاول ہاوس بھی جانا جانتے ہیں۔دوسری جانب ریڈ زون سمیت وفاقی دارلحکومت کے اہم مقامات کی سیکیورٹی رینجرز اور ایف سی کے حوالے کر دی گئی ۔ وزیر اعظم عمران خان کے خلاف عدم اعتماد کی تحریک اور او آئی سی اجلاس کے حوالے سے صورتحال کے پیش نظر دو ہزار رینجرز اور ایک ہزار ایف سی کو اسلام آباد طلب کیا گیا ہے۔رینجرز اور ایف سی کے جوان غیر معینہ مدت کے لیے اسلام آباد میں تعینات رہیں گے۔ حکومت اور اپوزیشن نے آئیندہ ہفتے اسلام آباد کے ریڈ زون میں عوامی قوت کا مظاہرہ کرنے کے الگ الگ اعلانات کر رکھے ہیں۔
