لاہور( این این آئی)مسلم لیگ (ن) کے ناراض رکن پنجاب اسمبلی میاں جلیل شرقپوری نے کہا ہے کہ اگر وزیر اعلیٰ پنجاب سردار عثمان بزدار کے خلاف تحریک عدم اعتماد آئی تو میں او رمیرے ہم خیال ساتھی وزیراعلی عثمان کے خلاف ووٹ نہیں ڈالیں گے

۔نجی ٹی وی سے گفتگو میں جلیل شرقپور ی نے کہا کہ ہمارا 12 لوگوں کا گروپ وزیراعلی کے ساتھ تھا، (ن) لیگ کے 5 ووٹ اب بھی میرے رابطے میں ہیں اور عثمان بزدار کے ساتھ ہیں۔انہوں نے کہا کہ میں اور 5 ساتھی عثمان بزدار کے خلاف ووٹ نہیں ڈالیں گے، عدم اعتماد لانا سیاسی پارٹیوں کا حق ہے۔انہوں نے کہا کہ عوام کی منتخب کردہ حکمران جماعت کو 5 سال پورے کرنے چاہئیں، عدم اعتماد کے پیچھے غیر ملکی ایجنڈا ہے۔انہوں نے کہا کہ جب ووٹ کا مرحلہ آئے گا پھر دیکھیں گے، وزیراعلی کو مشورہ ہے کہ اتحادیوں کے ساتھ معاملات ٹھیک کریں۔جلیل شرقپوری نے یہ بھی کہا کہ پنجاب میں حالات ٹھیک ہوں گے تو مرکز میں بھی ٹھیک ہو جائیں گے، میں شروع دن سے ہی حکومت کی حمایت کرتا رہا ہوں۔انہوں نے کہا کہ پہلے قومی مفاد دیکھوں گا پھر اپنے بارے میں سوچوں گا، مجھے کوئی وزارت یا مفاد نہیں چاہیے، صرف ملکی مفاد کے لیے عثمان بزدار کے ساتھ ہوں۔