جنیوا(این این آئی) اقوام متحدہ کی جانب سے جاری کردہ خوش ترین ممالک کی فہرست میں پاکستان نے بھارت کو پیچھے چھوڑ دیا۔غیرملکی خبررساں ادارے کی رپورٹ کے مطابق اقوام متحدہ کی دنیا کے سب سے خوش ترین ممالک کی فہرست میں امسال بھی فن لینڈ پہلے نمبر پر موجود ہے

جبکہ افغانستان سب سے آخری نمبر پر براجمان ہے۔فہرست میں ڈنمارک دوسرے، آئس لینڈ تیسرے، سوئٹزرلینڈ چوتھے اور نیدرلینڈز پانچویں نمبر پر موجود ہیں۔خوش رہنے والے ممالک میں لکسمبرگ چھٹے، سوئیڈن ساتویں، ناروے آٹھویں، اسرائیل نویں اور نیوزی لینڈ دسویں نمبر پر ہے۔فہرست میں آسٹریلیا 12ویں، جرمنی 14ویں، کینیڈا 15ویں، امریکا 16 ویں، برطانیہ 17 ویں اور فرانس 20 ویں نمبر پرموجود ہے۔سربیا، بلغاریہ اور رومانیہ نے بھی اپنا درجہ بلند کیا ہے تاہم لبنان معاشی بدحالی کے باعث خوش ترین ممالک کی فہرست میں افغانستان سے ایک نمبر پہلے یعنی 145 پر آگیا۔فہرست میں پاکستان کا نمبر ہے 103 جبکہ بھارت 136 ویں نمبر پر ہے دیگر ایشیائی ممالک میں بنگلادیش 99 ویں نمبر پر ہے۔خیال رہے کہ اقوام متحدہ کی جانب سے ہر سال خوش ترین ممالک کی فہرست جاری کی جاتی ہے گزشتہ سال پاکستان 105 جبکہ بھارت 139 ویں نمبر پر تھا۔