کراچی(این این آئی)وزیراعلی سندھ سید مراد علی شاہ نے پاکستان کے دراز قد شخص نصیر سومرو کے علاج کی ذمہ داری اٹھالی۔سندھ حکومت کی جانب سے دراز قامت پاکستانی نصیر سومرو کے علاج کیلئے 10لاکھ روپے کا امدادی چیک پیش کردیا گیا ہے۔

وزیر اعلی سندھ مراد علی شاہ نے نصیر سومرو کے علاج معالجے کے لیے 10 لاکھ کی گرانٹ منظور کر لی ہے۔وزیر توانائی سندھ امتیاز شیخ نے پاکستان کے دراز قد شخص نصیر سومرو سے کیا گیا وعدہ پورا کر دیا ہے۔امتیاز شیخ نے وزیر اعلی کا شکریہ ادا کرتے ہوئے کہا کہ میں وزیر اعلی سندھ کا بے حد مشکور ہوں۔انہوں نے کہاکہ نصیر سومرو پاکستان کا سرمایہ ہے، انکی بیماری کی صورتحال میں سندھ حکومت نے اپنا فریضہ ادا کیا ہے۔امتیاز شیخ نے کہا کہ نصیر سومرو کی ذاتی اور حکومتی سطح پر مدد جاری رکھیں گے، پاکستان پیپلز پارٹی حکومت کی اولین ترجیح اپنی عوام کی خدمت کرنا ہے۔واضح رہے کہ طویل القامت نصیر احمد سومرو کی عمر 51 برس ہے، وہ کافی عرصے سے بیمار ہیں۔