لاہور (این این آئی)مسلم لیگ (ق) کے سربراہ چوہدری شجاعت نے کہاہے کہ سابق صدر آصف علی زر داری ، جے یو آئی (ف) کے سربراہ مولانا فضل الرحمن اور اپوزیشن لیڈر شہباز شریف سے ملاقاتوں میں اہم تجاویز زیر غور آئیں جن کا ذکر ابھی نہیں کیا جاسکتا۔
اپنے بیان میں انہوںنے کہاکہ آج کل ملک کے اندر خاص طور پر لاہور میں سیاسی ماحول بنا ہوا ہے،ہر جماعت کے لیڈران مختلف باتیں کر رہے ہیں اور اپنی اپنی جماعتوں کے موقف بیان کر رہے ہیں۔ انہوںنے کہاکہ مولانا فضل الرحمن، آصف علی زرداری اور شہبازشریف ہمارے گھر ملاقات کیلئے آئے جس میں ہر قسم کے معاملات پر بات چیت ہوئی۔ انہوںنے کہاکہ بیس بیس، پچیس پچیس سال پرانے واقعات یہاں تک کہ میاں نوازشریف کے متعلق بھی بڑی تفصیل کے ساتھ باتیں ہوئیں۔ انہوںنے کہاکہ ان ملاقاتوں میں بعض تجاویز بھی زیر غور آئیں جن کا اس موقع پر ذکر قبل از وقت ہو گا۔ انہوںنے کہاکہ صرف سیاسی ملاقاتوں میں ہی مصروف رہے تو غریب عوام سیاستدانوں پر اعتبار کرنا چھوڑ دیں گے۔چودھری شجاعت حسین نے کہاکہ اگر معاشی حالات درست نہ کیے اور بے روزگاری کا مسئلہ حل نہ کیا تو تمام سیاستدانوں کی سیاست ختم ہو جائے گی۔ انہوںنے کہاکہ جو لوگ ہماری خدمت کرتے ہیں ان کے مسائل کو بھی سننا چاہیے ،معاشی حالات کو سب سے زیادہ اہمیت دی جانی چاہئے۔
