کراچی(این این آئی) دنیا کے کئی ممالک کی طرح پاکستان کو بھی قلت آب کا سامنا ہے۔ ماہرین کے مطابق پاکستان کو بہت جلد پانی کی شدید قلت سے دوچار ہونا پڑسکتا ہے۔کچھ تخمینوں کے مطابق 2025 میں یہاں قلت آب شدت اختیار کرجائے گی۔ 1965 اوسطاً ہر پاکستانی کے لیے 1165 مکعب میٹر پانی دستیاب تھا۔ یہ اوسط 2017 میں 265 مکعب میٹر فی شہری تک گر چکی تھی۔

پاکستان تازہ (میٹھے)پانی کا استعمال کرنے والا دنیا کا چوتھا بڑا ملک ہے۔ پانی کا سب سے زیادہ استعمال زرعی شعبے میں ہوتا ہے۔ماہرین کے مطابق زرعی شعبے میں پانی کی انتظام کاری کے جدید طریقے اپنائے نہ جانے کی وجہ سے بیشتر پانی ضائع ہوجاتا ہے۔ ماہرین کے مطابق گزرے برسوں میں اربوں روپے خرچ کرنے کے باوجود پانی کی انتظام کاری میں کوئی خاص بہتری نہیں آسکی۔ غالبا اس کی وجہ یہ ہے کہ کسان دستیاب پانی کی قدر نہیں کرتے۔