لندنِ ،کراچی، لاہور (اے پی پیِ، این این آئی)حکومت کی کوششیں رنگ لے آئیں، برطانیہ نے پاکستان کا نام سفری پابندیوں کی ریڈ لسٹ سے نکال دیا۔برطانوی وزیر ٹرانسپورٹ کے مطابق پاکستان کا نام ریڈ لسٹ سے نکالنے کے بعد ایمبر لسٹ میں شامل کر دیا گیا ہے۔ ایمبر لسٹ میں
موجود پاکستان سے جانے والے مسافروں کو 10 روز تک گھر میں قرنطینہ کرنا ہو گا، فیصلے کا اطلاق بدھ 22 ستمبر کی صبح 4 بجے سے ہوگا۔دریں اثنا پاکستان میں برطانوی ہائی کمشنر نے بھی اپنے ٹویٹ کے ذریعے فیصلے کی تصدیق کر دی۔دوسری جانب پی آئی اے نے برطانیہ کے لیے خصوصی پروازیں شروع کرنے کے لیے پلان تیار کرلیا ۔پی آئی اے اپنے مسافروں کو چارٹر فلائٹس کے ذریعے برطانیہ پہنچائے گا۔پاکستان انٹرنیشنل ائیرلائنز کے سی ای او ارشد ملک نے بتایا کہ پاکستان سے برطانیہ جانے والے مسافروں کیلئے خصوصی پروازیں چلائی جائیں گی۔انہوںنے کہاکہ برطانیہ کی طرف سے پاکستان کو کورونا پابندیوں والے ممالک کی ریڈ لسٹ سے نکالنے کے فیصلے کے فوری بعد تیاریاں شروع کردی ہیں۔ارشد ملک کے مطابق پی آئی اے کے مسافروں کو برطانیہ پہنچانے کے لیے خصوصی انتظامات کیے جارہے ہیں۔علاوہ ازیں صوبائی وزیر زراعت سید حسین جہانیاں گردیزی نے کہا ہے کہ برطانیہ کے پاکستان کو ریڈلسٹ سے نکالنے کے فیصلے کا خیر مقدم کرتے ہیں ، دنیا جانتی ہے کہ پاکستان نے کورونا وباء سے نمٹنے کیلئے غیر معمولی اقدامات اٹھائے ہیں اور اب کورونا ویکسی نیشن کا عمل بھی تیزی سے جاری ہے ،پاکستان کا نام ریڈ لسٹ سے نکلوانے کے لئے گورنر پنجاب چوہدری سرور کی کاوشیں قابل ستائش ہیں۔
