اسلام آباد (نیوز ڈیسک) معروف گلوکار عطا اللہ عیسیٰ خیلوی نے ڈیموں کی تعمیر کے حوالے سے باقاعدہ مہم چلانے کا اعلان کر دیا ہے، عطا اللہ نے کہا کہ وہ انتخابات کے بعد ڈیموں کی تعمیر کے لیے باقاعدہ مہم چلائیں گے اور ملک کے تمام بڑے شہروں میں شو کر کے ڈیموں کے لیے فنڈ اکٹھا کروں گا۔ اس موقع پر انہوں نے کہا کہ وہ ڈیموں کی تعمیر کے لیے منعقد کیے جانے والے شو کی تمام تر آمدن چیف جسٹس کے اکاؤنٹ میں جمع کروائیں گے۔
واضح رہے کہ ڈیموں کی تعمیر کے لیے چیف جسٹس نے دس لاکھ کا عطیہ کرکے اس کی ابتداء کی تھی، اس کے بعد آرمی چیف نے ایک ماہ کی تنخواہ اور آرمی کے جوانوں نے بھی اس میں حصہ ڈالنے کا اعلان کیا تھا، ہر کوئی پاکستان میں بڑھتے ہوئے پانی کے بحران کی وجہ سے پریشان ہے اور وہ اس کا حل چاہتا ہے، اسی وجہ سے معروف گلوکار عطاء اللہ عیسی خیلوی نے بھی ڈیموں کی تعمیر کے لیے فنڈ اکٹھا کرنے کا پروگرام بنایا ہے۔
