ممبئی(این این آئی) بالی ووڈ کے سلطان سلمان خان نے بھارت کے متنازعہ ریئلٹی شو ’’بگ باس‘‘ کے حوالے سے بڑا فیصلہ کیا ہے۔ مشہور ریئلٹی ٹی وی شو ’’بگ باس‘‘ کو بھارت میں کافی پذیرائی حاصل ہے اور اس کی
واحد وجہ بالی ووڈ کے دبنگ سلمان خان کی میزبانی ہے اور شو کی کامیابی کی وجہ بھی سلمان خان ہی سمجھے جاتے ہیں، جس کے باعث یہ شو مداحوں میں بہت مقبول ہے، مگر اب ان کے مداحوں کے لئے ایک بری خبر یہ ہے کہ سلمان خان نے ’’بگ باس‘‘ کی میزبانی کو جاری رکھنے سے انکار کردیا ہے۔بھارتی میڈیا رپورٹس کے مطابق سلمان خان اپنی نئی آنے والی فلم ’’ٹائیگر زندہ ہے‘‘ جو ’’ایک تھا ٹائیگر‘‘ کا سیکوئل ہے کی تشہیری مہم ختم ہونے کے بعد اب فلم کے ریلیز ہونے کا بے صبری سے انتظار کررہے ہیں جو 22 دسمبر کو سینما گھروں کی زینت بنے گی۔رپورٹس کے مطابق ’’بگ باس‘‘ کی انتظامیہ 11ویں سیزن میں سیلیبریٹیز کی وائلڈ کارڈ انٹریاں کرواکر شو کو فروری تک بڑھانا چاہتے تھے مگر سلمان خان نے شو کی مزید میزبانی سے انکار کردیا جس کی وجہ ان کے سونی ٹی وی کے ساتھ معاہدے کو قرار دیا جارہا ہے جس کے تحت وہ اپنے پرانے گیم شو ’’دس کا دم‘‘ سیزن تھری کی میزبانی کرتے ہوئے دکھائی دیں گے۔
