سان فرانسسکو(مانیٹرنگ ڈیسک) فیس بک کے بانی مارک زکر برگ نے اعلان کیا ہے کہ مستقبل میں صارفین کی پرائیویسی کو مزید مستحکم کرنے کے لئے اہم اقدام کئے جائیں گے۔ تفصیلات کے مطابق سماجی رابطوں کی سب سے مقبول سائٹ فیس بک کی انتظامیہ نے سوشل میڈیا سائٹ کی

سیکیورٹی بہتر بنانے کا اعلان کردیا۔ فیس بک کے بانی نے اس بات کا عندیہ دیا ہے کہ مستقبل قریب میں فیس بک پر ہونے والی چیٹ اینڈ ٹو اینڈ یوزر تک انکرپٹڈ ہوگی۔ یہی نہیں بلکہ صارفین کا پروفائل اور پرسنل ڈیٹا بھی انکرپٹڈ کردیا جائے گا، اور اسے صرف وہی لوگ دیکھ سکیں گے جن کے پاس انکرپشن کے حقوق ہوں گے، جبکہ نیوز فیڈ کے لئے اوپن پلیٹ فارم بھی فیس بک کا حصہ بننے جارہا ہے۔ خیال کیا جارہا ہے کہ ذاتی میسیجنگ کو انکرپٹ کرنے کا آئیڈیا واٹس ایپ پر انکرپشن کے کامیاب تجربے کو مد نظر رکھ کرکیا گیا ہے۔ یاد رہے جنوری میں سماجی رابطے کی سب سے بڑی ویب سائٹ فیس بک نے میسنجر ایپ میں نئی تبدیلیاں متعارف کرائی تھیں، فیس بک نے میسنجر میں صرف تین ٹیبز شامل کیے تھے، جن میں فلٹر آپشن دیا گیا، نئے ورژن کے تحت صارف جن لوگوں سے چیٹ کرنا چاہیے گا وہ ہی اُسے پیغام بھیج سکیں گے جبکہ اُس کی مرضی کے بغیر کوئی بھی میسج نہیں بھیج سکے گا۔ دسمبر 2018 میں اٹلی کے سرکاری ادارے نے شہریوں کا ڈیٹا دوسری کمپنیوں کو فروخت کرنے اور اُس کی حفاظت نہ کرنے پر کمپنی کو جرمانے کی سزا سنائی تھی۔ خیال رہے گذشتہ سال خیال رہے کہ چند ماہ قبل سامنے آنے والے کیمبرج اینالیٹیکا اسکینڈل کے بعد سماجی رابطے کی ویب سایٹ کو کافی بدنامی کا سامنا کرنا پڑا تھا اور اس کی ساکھ کو بھی بہت نقصان پہنچا تھا۔