اسلام آباد (نیوز رپورٹر)محکمہ موسمیات نے آئندہ 24 گھنٹوں کے دوران ملک کے مختلف حصوں میں بارش اور آندھی کا امکان ظاہر کیا ہے۔
ہم نیوز کی رپورٹ کے مطابق محکمہ موسمیات کا کہنا ہے کہ کشمیر، گلگت بلتستان، شمال مشرقی اور جنوبی پنجاب، پوٹھوہار ریجن، خیبرپختونخوا، مشرقی و جنوب مشرقی سندھ اور شمال مشرقی بلوچستان میں موسم جزوی طور پر ابر آلود رہے گا اور بعض مقامات پر آندھی، تیز ہواؤں اور گرج چمک کے ساتھ بارش کا امکان ہے۔ کچھ علاقوں میں ژالہ باری کی بھی پیشگوئی کی گئی ہے۔
محکمہ موسمیات کے مطابق بالائی خیبرپختونخوا میں کہیں کہیں موسلا دھار بارش بھی ہو سکتی ہے۔ ملک کے دیگر حصوں میں موسم عمومی طور پر گرم اور خشک رہے گا۔
گزشتہ 24 گھنٹوں کے دوران بھی زیادہ تر علاقوں میں موسم گرم اور خشک رہا، جبکہ خیبرپختونخوا اور شمال مشرقی بلوچستان کے چند مقامات پر بارش اور تیز ہوائیں چلیں۔
کراچی کے حوالے سے محکمہ موسمیات نے بتایا ہے کہ آج شہر میں شدید گرمی اور مرطوب موسم کا سامنا رہے گا، جبکہ نواحی علاقوں میں ہلکی بارش کی توقع ہے۔ زیادہ سے زیادہ درجہ حرارت 38 ڈگری سینٹی گریڈ تک جا سکتا ہے جبکہ نمی کے باعث گرمی کی شدت 45 ڈگری سینٹی گریڈ کے برابر محسوس ہو گی۔
