اسلام آباد (نیوز ڈیسک) وزیرِ دفاع اور مسلم لیگ (ن) کے سینئر رہنما خواجہ آصف نے ایک دلچسپ سوال کے جواب میں بھارتی لڑکی سے محبت کرنے والے پاکستانی نوجوان کو خبردار کر دیا۔ ڈیجیٹل میڈیا پلیٹ فارم “دی کرنٹ” کو دیے گئے انٹرویو میں خواجہ آصف سے ایک شہری نے سوال کیا کہ اگر ایک بھارتی لڑکی سے محبت ہو جائے تو کیا پاک-بھارت کشیدگی کے باوجود اس رشتے کو قائم رکھنا چاہیے؟

اس سوال پر مسکراتے ہوئے خواجہ آصف نے کہا کہ پاکستان اور بھارت کے درمیان چلی آنے والی دشمنی ان کی شخصیت کا اہم حصہ ہے۔ انہوں نے نوجوان کو مشورہ دیتے ہوئے کہا: “نہیں کرنی چاہیے شادی، رُل جاؤ گے!” ساتھ ہی انہوں نے ہنستے ہوئے تجویز دی کہ شادی کے لیے پاکستان میں ہی کسی لڑکی کا انتخاب کریں۔

خواجہ آصف کے اس بے ساختہ اور روایتی انداز میں دیے گئے جواب نے سوشل میڈیا پر بھی خاصا رنگ جما دیا۔ کئی صارفین نے ان کے مشورے کو زمینی حقیقتوں پر مبنی قرار دیا، جبکہ کچھ نے اسے سیاستدانوں کی پرانی سوچ کا عکاس کہا۔ ان کے مخصوص انداز میں “رُل جاؤ گے” کہنا کئی لوگوں کے لیے مزاحیہ اور دلچسپ بن گیا ہے۔

یہ گفتگو ایسے وقت میں سامنے آئی ہے جب پاکستان اور بھارت کے تعلقات انتہائی کشیدہ ہیں۔ حالیہ ہفتوں میں دونوں ممالک کے درمیان شدید سفارتی اور عسکری تناؤ دیکھا گیا ہے۔

واضح رہے کہ 6 اور 7 مئی کی درمیانی رات بھارت نے مبینہ طور پر پاکستان پر میزائل حملے کیے جنہیں انہوں نے “آپریشن سندور” کا نام دیا۔ پاکستان نے اس کارروائی کا سخت جواب دیتے ہوئے “آپریشن بنیان مرصوص” میں بھارت کے اہم عسکری ٹھکانوں کو نشانہ بنایا، جن میں پٹھان کوٹ، اُدھم پور اور بیاس میں واقع برہموس میزائل ڈیپو شامل تھے۔

یہ کشیدگی اپریل کے اواخر میں اُس وقت شروع ہوئی جب پہلگام (مقبوضہ کشمیر) میں ہونے والے دہشتگرد حملے میں 26 افراد جاں بحق ہو گئے، جن میں ایک نیپالی شہری بھی شامل تھا۔ بھارت نے اس واقعے کا الزام فوری طور پر پاکستان پر عائد کر دیا، تاہم پاکستان نے سختی سے ان الزامات کی تردید کرتے ہوئے شفاف بین الاقوامی تحقیقات کی پیشکش کی تھی۔