کراچی(این این آئی)پی ٹی آئی کے وائس چیئرمین شاہ محمود قریشی نے کہاہے کہ عظیم پاکستانیوں آج آپ لوگوں کو گھروں سے نکلنا ہوگا، اپنے عظیم قائد عمران خان کے لیے باہر نکلیں جو آپ کے مستقبل کی لڑائی لڑرہا ہے۔کراچی میں میڈیا سے گفتگو کرتے ہوئے انہوں نے کہا کہ کوئی گھروں میں نہ بیٹھے،

آپ حقیقی آزادی چاہتے ہیں تو اپنے بچوں، فیملیز کے ساتھ نکلیں اور عمران خان کے ساتھ اظہار یکجہتی کیجیے۔شاہ محمود قریشی نے کہا کہ عمران خان اسلام آباد ہائیکورٹ کے حکم پر پیش ہوئے تھے انہوں نے کہا تھا کہ گرفتاری کے لییے ذہنی طور پر تیار ہوں۔پی ٹی آئی رہنما نے کہا کہ ہائیکورٹ کے احاطے میں شیشے توڑے گئے، وکلا کو زخمی کیا گیا، ہماری لیڈر شپ کو دھکے دیے گئے جبکہ عمران خان کی ٹانگ زخمی ہے۔انہوں نے کہا کہ عوام نے خود سے اپنا احتجاج ریکارڈ کروانا شروع کردیا ہے، پاکستانیوں سے اپیل کرتا ہوں کہ آج آزمائش کا دن ہے، کارکنان سے اپیل ہے ہم نے کبھی بھی قانون شکنی نہیں کی ہمارے جتنے بھی احتجاج، مارچ اور دھرنے تھے پر امن تھے۔شاہ محمود قریشی نے کہا کہ یہ لڑائی عمران خان کی ذاتی نہیں، پاکستان کی حقیقی آزادی کی جنگ ہے۔