لاہور ( این این آئی) انسداد دہشتگردی کی خصوصی عدالت نے جوہر ٹائون دھماکہ میں ملوث 3 مجرموں کو جرم ثابت ہونے پر 9،9 مرتبہ سزائے موت کا حکم سنا دیا۔انسداد دہشت گردی عدالت کی ایڈمن جج عبہر گل خان نے مقدمے کی سماعت کی۔

سکیورٹی خدشات کے پیش نظر سماعت ویڈیو لنک کے ذریعے کی گئی۔عدالت نے گواہوں اور وکلا کی حتمی بحث کے بعد مقدمے کا فیصلہ سنایا۔ عدالت نے تینوں مجرموں کی جائیدادوں کو بھی ضبط کرنے کی ہدایت کردی۔سزائے موت پانیوالے میں سمیع الحق، عزیز اکبر اور نوید اختر شامل ہیں۔ مجرموں کے خلاف تھانہ جوہر ٹائون پولیس نے مقدمہ درج کررکھا ہے۔ملزمان کے خلاف سی ٹی ڈی انسپکٹر خالد اکبر نے چالان جمع کروایا تھا۔ اس مقدمے میں 4 مجرموں کو پہلے ہی سزائے موت ہو چکی ہے۔خیال رہے کہ جون 2021ء میں لاہور کے علاقے جوہر ٹائون میں ایک بم دھماکہ ہوا تھا۔دھماکے میں محکمہ انسداد دہشتگردی (سی ٹی ڈی) کے مطابق سکیورٹی پر مامور ایک پولیس اہلکار سمیت 3افراد جان سے گئے اور 24افراد زخمی ہوگئے تھے۔